Віцебская вобласць можа стаць лідарам у выкарыстанні мясцовых і альтэрнатыўных крыніц энергіі - Дамашкевіч

Віцебская вобласць можа выйсці на перадавыя пазіцыі ў рэспубліцы па выкарыстанні мясцовых і альтэрнатыўных крыніц энергіі. Такі пункт гледжання выказаў сёння падчас прыёму грамадзян памочнік Прэзідэнта Беларусі - галоўны інспектар па Віцебскай вобласці Мікалай Дамашкевіч, перадае карэспандэнт БЕЛТА.

Памочнік Прэзідэнта адзначыў эфектыўную працу ўпраўлення жыллёва-камунальнай гаспадаркі вобласці па выкарыстанні мясцовых відаў паліва, а таксама паведаміў, што прыватная кампанія зацікаўлена ў будаўніцтве біяэнергетычнай устаноўкі ў Віцебскім раёне. Інвестар гатовы ўкласці ў праект каля $400 млн. Аднак для рэалізацыі неабходна вылучыць 12 тыс.га зямель пад травы і кукурузу, паколькі біягаз будзе выпрацоўвацца з арганічных адходаў жывёлагадоўлі і сіласу. Па словах Мікалая Дамашкевіча, падобны праект ужо паспяхова рэалізуецца ў Мінскім раёне і прыносіць прыбытак у памеры 1,5 млн. еўра.

Старшыня Віцебскага райвыканкама Руслан Фурашоў далажыў памочніку Прэзідэнта, што ў цяперашні час з інвестарам вядзецца дэталёвая распрацоўка праекта.

Па дадзеных упраўлення ЖКГ Віцебскага аблвыканкама, у 2013 годзе каля Br149 млрд. будзе накіравана на энергазберажэнне. Сродкі інвестуюць у перавод 11 кацельняў на выкарыстанне мясцовых відаў паліва з механізаванай загрузкай, што дазволіць скараціць на працягу года спажыванне прыроднага газу на 14 млн.куб.м, павялічыць долю выкарыстання МВП у паліўным балансе з 55% на канец 2012 года да 67,8% да канца 2013-га. У сістэме аграпрамысловага комплексу на долю МВП у 2013 годзе прыйдзецца 28% ад агульнага паліўнага балансу. У цэлым па вобласці не менш за пятую частку ў кацельна-печаным паліве складуць МВП.