Віцебская вобласць далучылася да маштабнага рэспубліканскага аўтапрабегу, прысвечанага 80-годдзю трагедыі Хатыні
– Хатынь, спаленая фашыстамі 80 гадоў таму – 22 сакавіка 1943-га, – не проста старонка Вялікай Айчыннай вайны, гэта сімвал вялікай трагедыі, нясціхальная боль у сэрцы беларусаў, сапраўдных патрыётаў, – адзначыла старшыня абласной арганізацыі «Патрыёты Беларусі» Вольга Мацюсь.
Сёння з усіх раёнаў краіны стартавалі аўтапрабегі, якія накіроўваюцца ў Мінскую вобласць. У Віцебску ён пачаўся з ускладання кветак да Вечнага агню мемарыяльнага комплексу «Тры штыкі».
– Прадстаўнікі розных пакаленняў, грамадскіх аб'яднанняў сабраліся ля Вечнага агню, каб яшчэ раз дакрануцца душой да гэтага мемарыяльнага комплексу, прачуць боль невінаватых людзей, на долю якіх выпалі нечалавечыя пакуты. Ад крыўды, што праз 80 гадоў мы павінны адстойваць гонар і годнасць ветэранаў, наварочваюцца слёзы, – адзначыла Вольга Мацюсь. – Усе разам у адным парыве мы павінны аб'яднацца і ні ў якім разе не дапусціць тых страшных падзей сёння. Сапраўдныя патрыёты абавязаны абараніць сваю гісторыю і перадаць яе падрастаючаму пакаленню, каб яны памяталі тую страшную вайну, у якой мы былі непакораныя і непераможныя. Нас не зламаць, таму што мы – разам!
З Віцебска стартавала 10 машын, удзельнікі аўтапрабегу з Наваполацка, Полацка, Оршы далучацца да калоны пад Лепелем. Збор удзельнікаў з усіх раёнаў краіны адбудзецца ў Мінску, калоны машын накіруюцца ў Хатынь.
На зваротным шляху прадстаўнікі Віцебскай вобласці наведаюць мемарыяльны комплекс «Праклён фашызму» у Шунеўцы Докшыцкага раёна, дзе пройдзе мітынг і ўскладанне кветак.
"Віцебскія весці"