Віцебская вобласць вылучыла кандыдатаў у Савет Рэспублікі
Абмеркаванне кандыдатур прэтэндэнтаў у верхнюю палату парламента адбывалася на сумесным пасяджэнні прэзідыумаў мясцовых Саветаў дэпутатаў і выканаўчых камітэтаў. Усяго вылучана восем кандыдатур.
Лёзненскі, Гарадоцкі, Шумілінскі і Віцебскі раёны зможа прадстаўляць рэктар Віцебскага дзяржаўнага медыцынскага ўніверсітэта доктар медыцынскіх навук Анатоль Шчасны. Аўтарытэтны кіраўнік ВНУ і дасведчаны ўрач зараз з'яўляецца дзеючым членам Савета Рэспублікі. У Віцебску прапанавалі кандыдатуру дырэктара тэлерадыёкампаніі "Віцебск" Алены Панцюховай. Ураджэнка Віцебска добра ведае родны горад, яго праблемы і таксама абіралася ў верхнюю палату парламента.
Аршанскі і Дубровенскі раёны можа прадставіць Юрый Дзеркач. Ён доктар медыцынскіх навук і ўжо амаль дзесяць гадоў кіруе сістэмай аховы здароўя Віцебскай вобласці. Упершыню ў спіс удзельнікаў кампаніі ўвайшоў старшыня Наваполацкага гарвыканкама Дзмітрый Дзямідаў. Ён стаў кандыдатам ад Наваполацка і Расонаў.
У спісе прэтэндэнтаў таксама начальнік галоўнага ўпраўлення гандлю і паслуг аблвыканкама Ірына Леўковіч. Яе кандыдатуру падтрымалі ў Бешанковічах, Сенне, Чашніках і Талачыне. Глыбокскі, Докшыцкі, Лепельскі і Ушацкі раёны ў верхняй палаце парламента можа прадставіць дэпутат абласнога Савета дэпутатаў, начальнік рэгіянальнай дырэкцыі па Віцебскай вобласці ААТ "Белаграпрамбанк" Алег Жынгель.
Таксама ў лік удзельнікаў кампаніі ўвайшлі генеральны дырэктар КУП "Віцебскаблдарбуд" Уладзімір Мацвееў (Браслаўскі, Мёрскі, Пастаўскі і Шаркаўшчынскі раёны) і дырэктар Полацкага каледжа Віцебскага дзяржуніверсітэта імя П.М.Машэрава Таццяна Палушкіна (ад Полацкага і Верхнядзвінскага раёнаў).
Выбары членаў Савета Рэспублікі адбудуцца па ўсёй краіне 7 лістапада на сумесным пасяджэнні дэпутатаў мясцовых Саветаў базавага ўзроўню шляхам таемнага галасавання.