Віцебскія дэсантнікі правялі парад для ветэрана вайны
Напярэдадні Дня Перамогі вайскоўцы брыгады павіншавалі 95-гадовага Аляксея Іванова. Салдаты прайшлі ўрачыстым маршам каля дома ветэрана, а ваенны аркестр выканаў вядомыя мелодыі ваенных гадоў. "У асобе Аляксея Міхайлавіча дэсантнікі 103-й Віцебскай асобнай гвардзейскай паветрана-дэсантнай брыгады павіншавалі ўсіх ветэранаў і працаўнікоў тылу з надыходзячым вялікім святам - Днём Перамогі", - адзначыў намеснік камандзіра брыгады па ідэалагічнай рабоце гвардыі падпалкоўнік Дзяніс Крывянцоў.
Аляксей Іваноў нарадзіўся ў Слуцкім раёне. Вайна яго застала ў Ленінградзе, калі ён вучыўся ў школе ФЗН. Хлопца эвакуіравалі, ён працаваў у тыле і паспеў прайсці артылерыйскія курсы. Прызвалі Аляксея Міхайлавіча ў армію ў 1944 годзе, ён вызваляў цяперашнюю Калінінградскую вобласць. Пасля вайны скончыў ваеннае артылерыйскае вучылішча ў Сумах (Украіна). Ветэран шмат гадоў аддаў тагачаснай 103-й паветрана-дэсантнай дывізіі, праслужыўшы на розных пасадах. У запас сышоў у званні палкоўніка і працаваў ваенруком у Лужаснянскім сельгастэхнікуме.
Аляксей Міхайлавіч быў рады такому падарунку ад салдат. Па словах родных, ён старанна рыхтаваўся, прыводзіў у парадак парадную форму. "Дзякуй, што не забываеце нас, ветэранаў. Памятайце, што калі б мы не перамаглі ў той вайне, нікога з наступных пакаленняў не было б. Быў страшны час, але мы выстаялі", - адзначыў удзельнік Вялікай Айчыннай вайны.
Пасля парада ветэран падзяліўся з вайскоўцамі ўспамінамі аб ваенных гадах.