Віцебскія і в’етнамскія навукоўцы пашыраць супрацоўніцтва ў галіне матэрыялазнаўства

Віцебскі інстытут тэхнічнай акустыкі НАН Беларусі (ВІТА) пашырае партнёрства з вядучымі акадэмічнымі ўстановамі В'етнама па выкананні супольных распрацовак у галіне матэрыялазнаўства. У ходзе нядаўняга Міжнароднага эканамічнага форуму ВІТА падпісаў два пратаколы аб намерах развіваць супрацоўніцтва ў гэтай сферы.

З інстытутам матэрыялазнаўства НАН В'етнама віцебскія навукоўцы ўзаемадзейнічаюць больш за год, і цяпер партнёрства замацавана афіцыйным дакументам. На форуме да яго далучылася яшчэ адна акадэмічная структура гэтай паўднёваазіяцкай краіны – Цэнтр развіцця высокіх тэхналогій НАН.

Па словах дырэктара ВІТА члена-карэспандэнта НАН Беларусі Васіля Рубаніка, в'етнамскія калегі зацікаўлены ў правядзенні супольных даследаванняў па шырокім спектры напрамкаў. Гэта і вывучэнне спецыяльных сплаваў з эфектам памяці формы, выкарыстанне ультрагукавых ваганняў для паляпшэння ўласцівасцей ліцейных сплаваў, у тым ліку алюмініевых. Таксама навукоўцы дзвюх краін маюць намер паглыбляць веды па працэсах механічнай актывацыі металічных парашкоў для іх наступнага спякання і атрымання гатовых вырабаў.

Да гэтых супольных даследаванняў віцебскія навукоўцы прыцягваюць і маладых спецыялістаў, адзначыў Васіль Рубанік. Работы выконваюцца як на базе ВІТА НАН Беларусі, так і ВДТУ ў лабараторыі «Перспектыўныя матэрыялы і тэхналогіі».

Сяргей Анто́наў, «Віцебскія навіны».