Віцебскія кардыёлагі асвойваюць інвазівнае лячэнне тахіарытміі

25 сакавіка, Віцебск /Дзіяна Курыла - БЕЛТА/. Інвазіўнае лячэнне хворых з тахіарытміяй пачынаюць у кардыяхірургічным аддзяленні Віцебскай абласной клінічнай бальніцы, паведаміў карэспандэнту БЕЛТА загадчык аддзялення, кандыдат медыцынскіх навук, член Савета Рэспублікі Аляксандр Зянькоў. Тахіарытмія - пачашчанае сэрцабіцце, прычынай якога становяцца паталагічныя змяненні ў сардэчнай мышцы, якія прыводзяць да дадатковых імпульсаў і павелічэння частаты скарачэнняў у хвіліну з нармальных 60-80 да 120 і вышэй. Рознымі формамі тахіарытмій пакутуюць 20-25% насельніцтва Беларусі. Як правіла, гэта людзі працаздольнага ўзросту. Значнай частцы з іх паказана інвазіўнае ўмяшанне з дапамогай радыёчастотнай абляцыі. Яе сутнасць заключаецца ў тым, што з дапамогай спецыялізаванай навігацыйнай сістэмы і катэтара хірург разбурае паталагічныя ачагі, тым самым вяртаючы працу сэрца да нормы. Пакуль у Беларусі гэтай методыкай у поўнай меры валодаюць сталічныя кардыяхірургі. У Віцебскай абласной клінічнай бальніцы ўжо ёсць спецыяльнае абсталяванне. Цяпер вядзецца падрыхтоўка пацыентаў, і ў красавіку будуць праведзены першыя аперацыі па інвазіўных методыках. У абласной клінічнай бальніцы ўжо ўкаранёны ўсе стандартныя кардыяхірургічныя ўмяшанні: аперацыі на адкрытым сэрцы, у тым ліку аортакаранарнае шунтаванне, пратэзаванне і пластыка клапаннага апарата, а таксама аперацыі са штучным кровазваротам, аперацыі на працуючым сэрцы. Акрамя таго, у кардыяхірургічным аддзяленні выконваецца шырокі спектр умяшанняў на аорце і магістральных артэрыях, шунтаванне артэрый, пратэзаванне, пластыка артэрый.-0-