Віцебскія пенсіянеры і адпачывальнікі дапамагаюць вяскоўцам збіраць ураджай

Віцебскі цэнтр занятасці штодня накіроўвае на дапамогу вяскоўцам каля 70 чалавек, паведамілі карэспандэнту БЕЛТА ва ўпраўленні па працы, занятасці і сацыяльнай абароне Віцебскага гарвыканкама.

У складзе працоўнага дэсанту – пенсіянеры, адпускнікі, а таксама беспрацоўныя. "Такая форма занятасці карыстаецца папулярнасцю ў жыхароў Віцебска, якія маюць вольны час. Дапамагаючы вяскоўцам збіраць ураджай, у дзень можна зарабіць ад 50 да 90 тысяч рублёў і плюс да гэтага прывезці з кожнай такой камандзіроўкі некалькі кілаграмаў агародніны – гаспадаркі часткова разлічваюцца з часовымі работнікамі вітаміннай прадукцыяй. За сезон лёгка можна забяспечыць сям'ю агароднінай і садавінай на ўсю зіму", – падкрэслілі ў службе занятасці.

Упраўленне накіроўвае работнікаў у гаспадаркі Віцебскага і Гарадоцкага раёнаў. Дапамогай гараджан ахвотна карыстаюцца ААТ "Ліпаўцы", "Адраджэнне", "Рудакова", СПК "Альгоўскае", КСВП "Паўночны", а таксама РУП "Віцебскі занальны інстытут сельскай гаспадаркі НАН РБ". Гэтыя прадпрыемствы апрацоўваюць вялікую колькасць буракоў, морквы, капусты і бульбы, уборцы якіх і дапамагаюць гараджане. Акрамя таго, дадатковая рабочая сіла выкарыстоўваецца на жывёлагадоўчых комплексах і пры вызваленні пасяўных плошчаў ад камянёў.

У цэнтр занятасці штогод паступаюць заяўкi ад Лужаснянскай сартавыпрабавальнай станцыі. Дадатковую рабочую сілу прыцягваюць да збору ўраджаю яблыкаў і груш. Штодня ў садзе працуюць да 15 гараджан.

Сезон збору ўраджаю асноўных агародніны і садавіны на Віцебшчыне толькі пачаўся. Пік яго традыцыйна прыпадае на канец жніўня – верасень. У гэты перыяд на дапамогу вяскоўцам гарадскі цэнтр занятасці будзе накіроўваць да 150 чалавек у дзень.