Віцебскія спецыялісты падрыхтавалі для падлеткаў факультатыў па кіраванні эмоцыямі

Віцебскі абласны клінічны цэнтр псіхіятрыі і наркалогіі сумесна з медыцынскім універсітэтам і абласным інстытутам развіцця адукацыі распрацавалі цыкл факультатыўных заняткаў для падлеткаў "Мы самі" па кіраванні эмоцыямі і паводзінамі. Праграма прайшла ўзгадненне ў Міністэрстве адукацыі і сёлета зацверджана як цыкл факультатыўных заняткаў для ўстаноў адукацыі ўсёй краіны, паведамілі карэспандэнту БЕЛТА ў цэнтры псіхіятрыі і наркалогіі.

Мэтадыка была апрабавана яшчэ на стадыі зацвярджэння ў пяці школах вобласці і атрымала станоўчыя водгукі па выніках скрынінгавага даследавання.

Праграма разлічана на вучняў 5-8 класаў з добрымі паводзінамі, якія падвяргаюцца негатыўным уплывам, стрэсам і часта не могуць ім супрацьстаяць. На групавых занятках дзеці, якія раней замаўчалі свае праблемы, могуць расказаць, што іх турбуе. Школьнікаў вучаць кіраваць эмоцыямі, пераадольваць страх, трывогу, спады настрою, супрацьстаяць уцягванню ў негатыўныя групоўкі. Гэта значыць, мэта праграмы - навучыць дзяцей быць самадастатковымі, гаварыць "не", калі гэта неабходна.

Цыкл уключае 12 трэнінгавых заняткаў з інтэрактыўнымі элементамі і гульнямі, якія праводзіць педагог-псіхолаг. У канцы навучальнага года плануецца параўнаць вынікі дзяцей, якія прайшлі курс факультатыва, і тых, хто яго не наведваў.

Кацярына Князева