Віцебскі аэрапорт адкрывае сезон пералётаў да Калінінграда

Як паведаміў начальнік участка сэрвісу аэрапорта Сяргей Глебко, палёты ў Калінінград будуць ажыццяўляцца з 8 чэрвеня па 31 жніўня два разы на тыдзень па пятніцах і нядзелях з вылетам з Віцебска адпаведна ў 15.20 і 11.45. Самалёт CRJ на 50 месцаў даставіць пасажыраў да месца прызначэння крыху больш, чым за гадзіну.

Цэны на білеты (ад 63 еўра), якія прапанавала авіякампанія «Белавія», захаваны на ўзроўні мінулага года і дазволяць канкурыраваць з наземнымі відамі транспарту, павысіць даступнасць і прывабнасць авіяпадарожжаў.

Гэты напрамак быў выбраны перавозчыкам з разлікам на запатрабаванасць у жыхароў не толькі Віцебшчыны і суседніх абласцей, але і прыгранічных расійскіх рэгіёнаў.

Сёння Калінінград – найбліжэйшы да Беларусі горад, у якім пройдзе чэмпіянат свету па футболе. Заходнюю мяжу нашай краіны і стадыён «Балтыка» падзяляюць крыху больш за 200 кіламетраў (Масква ад, скажам, Ліёзна ў два разы далей. У Калінінградзе згуляюць зборныя Англіі і Бельгіі, Іспаніі і Марока, Сербіі і Швейцарыі, Харватыі і Нігерыі.

СЯРГЕЙ АНТОНАЎ, фота з архіва «Віцебскія весці».