Віцебскі дзяржуніверсітэт падрыхтаваў да свайго юбілею кнігу пра векавую гісторыю ВНУ

21 кастрычніка, Віцебск /Сяргей Кочатаў - БЕЛТА/. Віцебскі дзяржаўны ўніверсітэт імя П.М.Машэрава падрыхтаваў да выдання кнігу аб векавой гісторыі ВНУ, стагоддзе якой будзе адзначацца ў лістападзе бягучага года. Трохсотстаронкавы фаліянт будзе ўручаны ў якасці падарунка ганаровым гасцям юбілейных урачыстасцей, на якія запрошаны ветэраны інстытута і калегі з больш чым 30 ВНУ-партнёраў. Аб гэтым карэспандэнту БЕЛТА паведаміў начальнік рэдакцыйна-выдавецкага аддзела ВДУ Артур Мацеюн. Асноўнай мэтай выдання з'яўляецца прадстаўленне багатай на падзеі і традыцыі летапісу найстарэйшай навучальнай установы Беларусі, а таксама прэзентацыя сучаснага развіцця ВНУ, яго ўзрастаючай ролі ў адукацыйным, інавацыйным і культурным развіцці вобласці і краіны. У кнігу, падрыхтаваную аўтарскім калектывам пад кіраўніцтвам рэктара ВДУ прафесара Аляксандра Саладкова, увайшлі матэрыялы, якія адлюстроўваюць навучальную, навуковую і міжнародную дзейнасць універсітэта, усе аспекты падрыхтоўкі навукова-педагагічных кадраў, а таксама праводзімую выхаваўчую работу. Ва ўступным слове рэктар універсітэта адзначае, што біяграфія ўніверсітэта неадрыўна звязана з біяграфіяй Беларусі, а выпускнікі-"машароўцы", колькасць якіх за 100 гадоў налічвае дзясяткі тысяч, працуюць у розных сферах. "Захоўваючы векавыя традыцыі, мы ўлічваем патрэбы сучаснасці, прыўносім у работу ВНУ апошнія дасягненні навукі і тэхнікі, шукаем новыя метады і формы педагагічнай работы", - падкрэслівае Аляксандр Саладкоў. Выданне адкрывае кароткі нарыс развіцця ВДУ, а таксама біяграфіі ўсіх кіраўнікоў ВНУ за 100 гадоў. Структурна кніга складаецца з галоў, прысвечаных усім адзінаццаці факультэтам, а таксама падраздзяленням, у тым ліку Полацкаму і Аршанскаму каледжам. Асобныя старонкі выдання прысвечаны выдатным выпускнікам універсітэта, сярод якіх нямала Герояў Савецкага Саюза, вучоных, заслужаных дзеячаў адукацыі, навукі і мастацтва. Пры падрыхтоўцы выдання выкарыстоўваліся матэрыялы Нацыянальнага архіва Беларусі, дзяржаўнага архіва Віцебскай вобласці, архіва і музея ВДУ. Маючаму адбыцца 100-гадоваму юбілею ў ВДУ прысвечаны практычна ўсе навуковыя, адукацыйныя і грамадска значныя мерапрыемствы ўніверсітэта, якія праходзяць і плануюцца ў бягучым годзе. Сярод іх міжнародныя і рэспубліканскія навукова-практычныя канферэнцыі, шматлікія студэнцкія акцыі - паходы па мясцінах баявой і працоўнай славы Пятра Машэрава, ушанаванне ветэранаў і заслужаных работнікаў універсітэта, конкурсы творчых і навуковых работ. Усяго ў план па падрыхтоўцы да святкавання 100-годдзя ўніверсітэта ўключана амаль 100 мерапрыемстваў, якія праходзяць у ВНУ фактычна кожны тыдзень. Віцебскі настаўніцкі інстытут быў адкрыты 21 лістапада 1910 года для падрыхтоўкі настаўнікаў вышэйшых пачатковых вучэльняў і стаў першай навучальнай установай такога тыпу на тэрыторыі сучаснай Беларусі. Пры інстытуце складалася двухкласнае гарадское вучылішча для практычных заняткаў выхаванцаў з 3-гадовым курсам навучання. У інстытут прымалі маладых людзей усіх званняў і саслоўяў не маладзейшых за 16 гадоў. Кожны паступаючы даваў падпіску адпрацаваць не менш за 6 гадоў на пасадзе настаўніка гарадскога вучылішча па размеркаванні вучэбнага начальства. У штат ВНУ уваходзілі дырэктар, 15 выкладчыкаў, законавучыцель, лекар і пісар. У інстытуце выкладаліся педагогіка, руская і царкоўнаславянская мовы, арыфметыка, алгебра, геаметрыя, гісторыя, геаграфія, прыродазнаўства і фізіка, чарчэнне і маляванне, чыстапісанне, спевы і гімнастыка, ручная праца. Віцебскі настаўніцкі інстытут існаваў да 1917 года, пасля рэвалюцыі перададзены ў веданне Наркамасветы і ператвораны ў педагагічны інстытут. У снежні 1934 года педінстытуту прысвоена імя Сяргея Кірава. З 1 верасня 1995 года Віцебскі дзяржаўны педагагічны інстытут імя С.Кірава ператвораны ў Віцебскі дзяржаўны ўніверсітэт, які з лютага 1998 года носіць імя Пятра Машэрава, выпускніка віцебскай ВНУ. Сёння ўніверсітэт вядзе падрыхтоўку спецыялістаў у галіне педагогікі, псіхалогіі, гуманітарных, прыродазнаўча-матэматычных навук, мастацтва і дызайну, права, сацыяльнай работы і фізічнай культуры. Усяго ВНУ рыхтуе спецыялістаў з вышэйшай адукацыяй па васьмі профілях, 40 спецыяльнасцях, 15 напрамках і 35 спецыялізацыях на 11 факультэтах. У 2009 годзе выпускнікамі ВНУ дзённай формы навучання сталі амаль 1 тысяча маладых спецыялістаў. Сёння ў ВДУ вучацца больш за 4,7 тыс. студэнтаў на дзённым і амаль 5,5 тыс. на завочным аддзяленнях.-0-