Віцебскі медуніверсітэт узначаліў новы рэктар – Анатоль Шчасны
16 сакавіка Прэзідэнт Рэспублікі Беларусь разгледзеў шэраг кадравых пытанняў, у тым ліку даў згоду на прызначэнне на пасаду намесніка міністра спорту і турызму Рэспублікі Беларусь старшыні Віцебскага Савета дэпутатаў Міхаіла Партновага. Акрамя таго, рэктарам Віцебскага дзяржаўнага ордэна Дружбы народаў медыцынскага ўніверсітэта прызначаны доктар медыцынскіх навук, дацэнт кафедры хірургіі факультэта павышэння кваліфікацыі і перападрыхтоўкі кадраў ВДМУ, прафесар Анатоль Шчасны.
Анатоль Тадэушавіч нарадзіўся ў 1961 годзе ў Клецку Мінскай вобласці, у 1984-м скончыў Віцебскі дзяржаўны медыцынскі інстытут. Да прызначэння на пасаду рэктара з'яўляўся кіраўніком першага абласнога навукова-практычнага цэнтра «Хірургія захворванняў печані і падстраўнікавай залозы», які створаны з мэтай распрацоўкі эфектыўных метадаў прафілактыкі і лячэння гэтых захворванняў і навуковых даследаванняў па дадзенай праблеме. Некаторы час быў галоўным хірургам упраўлення аховы здароўя Віцебскага абласнога выканаўчага камітэта. У 2014 годзе стаў лаўрэатам звання «Чалавек года Віцебшчыны».
Анатоль Шчасны выказаў падзяку за высокую ацэнку яго дзейнасці і аказаны давер пры прызначэнні на пасаду.
Намеснік старшыні аблвыканкама Уладзімір Церанцьеў ад імя выканаўчай улады падзякаваў Валерыя Дзякалу за плённую працу, Анатолю Шчаснаму пажадаў не толькі падтрымліваць зададзены ўзровень, але і ўдасканальваць, развіваць універсітэт:
"Новых вышынь з новым рэктарам!".Наталля Камлёва, "Віцебскія весці"