Віцебскі абласны фестываль нацыянальных культур збярэ прадстаўнікоў 13 дыяспар

7 лістапада, Віцебск /Вольга Багачова - БЕЛТА/. Віцебскі абласны фестываль нацыянальных культур збярэ 14 лістапада ў Міёрскім раёне прадстаўнікоў 13 нацыянальнасцей, паведаміў карэспандэнту БЕЛТА начальнік аддзела культуры Міёрскага райвыканкама Аляксандр Траськін. У свяце пад назвай "Нас з'яднала зямля Беларусі" прымуць удзел прадстаўнікі розных нацыянальных дыяспар з 15 раёнаў і гарадоў вобласці. Гэта ўкраінцы, рускія, палякі, чачэнцы, армяне, малдаване, таджыкі, азербайджанцы, татары, яўрэі, цыганы, узбекі, беларусы - усяго больш за 300 чалавек. Дэлегацыі ўдзельнікаў будуць уключаць прадстаўнікоў як адной, так і некалькіх нацыянальнасцей. Так, Полацкі раён прывязе прадстаўнікоў народнага клуба армянскай культуры "Хаш". У склад дэлегацыі Сенненскага раёна ўвойдуць прадстаўнікі чачэнскага народа і ўкраінцы. На фестывалі ўдзельнікам трэба будзе выступіць у канцэрце мастацкай самадзейнасці, прадставіць свае работы, якія адлюстроўваюць нацыянальны дух і культуру, на выстаўках мастацкага мастацтва і дэкаратыўна-прыкладной творчасці, а таксама паўдзельнічаць у выстаўцы-дэгустацыі страў нацыянальных кухняў. Мерапрыемства праводзіцца ў пяты раз. Яно заклікана садзейнічаць развіццю дружбы прадстаўнікоў розных нацыянальнасцей, якія пражываюць у Беларусі. Арганізатарамі фестывалю выступаюць аддзел культуры Міёрскага райвыканкама, упраўленне культуры Віцебскага аблвыканкама і Віцебскі абласны метадычны цэнтр народнай творчасці.-0-