Віцебскі аблвыканкам папярэдзіў 17 грамадзян аб адказнасці за сістэматычныя неабгрунтаваныя звароты

Віцебскі аблвыканкам летась папярэдзіў 17 грамадзян аб адказнасці за сістэматычна накіраваныя неабгрунтаваныя звароты ў аблвыканкам, паведамілі карэспандэнту БЕЛТА ў аддзеле па рабоце са зваротамі грамадзян і юрыдычных асоб Віцебскага аблвыканкама.

У аблвыканкаме створана рабочая група для вызначэння неабходных мер рэагавання на сістэматычна накіраваныя ў аблвыканкам неабгрунтаваныя звароты грамадзян. У дачыненні да 17 "хранічных" заяўнікаў на падставе пункта 1 артыкула 21 (разгляд паўторных зваротаў) закона "Аб зваротах грамадзян і юрыдычных асоб" прыняты рашэнні аб спыненні перапіскі па выкладзеных у зваротах пытаннях, у тым ліку з 9 грамадзянамі, якія сістэматычна накіроўвалі такія звароты ў аблвыканкам і вышэйстаячыя дзяржаўныя органы. Заяўнікі пісьмова папярэджаны аб тым, што ў адпаведнасці з п.2 артыкула 19 (расходы, звязаныя з разглядам зваротаў) закона з іх у судовым парадку могуць быць спагнаны расходы, панесеныя ў сувязі з разглядам іх пастаянных неабгрунтаваных скаргаў.

Па дадзеных спецыялістаў аддзела, ад гэтых грамадзян, да вынясення рашэння аб спыненні з імі перапіскі, паступіла ў цэлым больш за 200 неабгрунтаваных зваротаў. Напрыклад, з вышэйстаячых арганізацый у аблвыканкам паступіла 16 зваротаў жыхаркі Сенненскага раёна - кожнае пятае з раёна, якія па выніках разгляду прызнаны неабгрунтаванымі. Кіраўнік установы, на якога пастаянна скардзілася грамадзянка, вымушаны быў скарыстацца правам судовай абароны ў сувязі са змешчанымі ў зваротах ілжывымі звесткамі.

Летась у аблвыканкам паступіла каля 3,9 тыс. зваротаў грамадзян, пры гэтым колькасць пісьмовых зваротаў склала 98,3% да 2011 года, вусных - 82,7%, а колькасць электронных зваротаў узрасла ўтрая. Па выніках разгляду зваротаў грамадзян, якія паступілі ў аблвыканкам, прызнаны абгрунтаванымі і задаволены 429 зваротаў грамадзян, або 13,5% ад колькасці паступіўшых летась і ўзятых на кантроль.