Віцебскі анкодыспансер упершыню правядзе акцыю па прафілактыцы раку прадсталёвай залозы

10 ліпеня, Віцебск /Сяргей Качатоў - БЕЛТА/. Акцыя па прафілактыцы рака прастаты ўпершыню пройдзе ў Віцебскай вобласці 11 ліпеня па ініцыятыве абласнога клінічнага анкалагічнага дыспансера, паведаміў карэспандэнту БЕЛТА загадчык паліклінічным аддзяленнем дыспансера Міхаіл Скудскі. Напярэдадні акцыі, з 29 чэрвеня, ва ўсіх лячэбна-паліклінічных установах вобласці спецыялісты-уролагі праводзілі агляд пацыентаў і пры падазрэнні на наяўнасць наватвораў накіроўвалі на комплекснае абследаванне ў анкадыспансер. Па папярэдняй інфармацыі, на прыём ужо запісаліся каля 70 мужчын. Выхадны дзень выбраны спецыяльна, так што звярнуцца за кансультацыяй да анкалагічных спецыялістаў змогуць усе ахвотныя. Асноўнай мэтай акцыі з'яўляецца прыцягненне ўвагі мужчын да праблем уласнага здароўя, бо любыя парушэнні ў працы мочапалавой сістэмы арганізма павінны стаць падставай для звароту да ўрача, падкрэсліў Міхаіл Скудскі. Разам з тым нізкая зваротнасць прыводзіць да запушчанасці захворванняў, якія складана і доўга лечацца. Па статыстыцы, за апошнія 35 гадоў у Беларусі колькасць хворых мужчын вырасла ў 8,1 раза, па распаўсюджанасці гэта захворванне выходзіць на трэцяе месца сярод злаякасных наватвораў у мужчын. Віцебскі анкадыспансер мае вопыт правядзення маштабных прафілактычных акцый. Сёлета гэта ўжо чацвёртае падобнае мерапрыемства, але ўпершыню мэтавай аўдыторыяй для спецыялістаў-анкалагаў сталі мужчыны. Паліклінічнае аддзяленне Віцебскага анкадыспансера з'яўляецца адзінай установай у вобласці, дзе поўнае абследаванне пацыента, які звярнуўся, праводзіцца на працягу аднаго дня. За гэты час спецыялісты аддзялення выконваюць эндаскапічнае, рэнтгеналагічнае, ультрагукавое даследаванні і аналіз крыві на спецыфічныя анкомаркеры. Пры неабходнасці праводзіцца забор матэрыялу для марфалагічнага пацвярджэння дыягназу, што таксама робіцца на працягу дня. Акрамя таго, ва ўралагічным аддзяленні асвоены аперацыі па выдаленні ракавых пухлін з адначасовай пластычнай карэкцыяй, што дазваляе пацыенту не толькі вылечыцца ад раку, але і захаваць якасць жыцця.-0-