Віцебскі прыборабудаўнічы завод вырабіць 85 тыс. медалёў да 65-годдзя Перамогі

5 сакавіка, Віцебск /Вольга Багачова - БЕЛТА/. Віцебскі прыборабудаўнічы завод атрымаў буйны заказ на выраб памятных медалёў да 65-годдзя Перамогі, паведаміў карэспандэнту БЕЛТА намеснік галоўнага інжынера прадпрыемства Леў Мушкін. Па замове Міністэрства абароны віцебскаму прадпрыемству трэба будзе вырабіць для віншавання ветэранаў, удзельнікаў вайны і былых малалетніх вязняў вайны 85 тыс. юбілейных медалёў "65 гадоў Перамогі ў Вялікай Айчыннай вайне". Першая партыя медалёў у аб'ёме 6 тыс. штук адправіцца да заказчыка ўжо 10 сакавіка. Апошнюю пастаўку плануецца ажыццявіць да 25 красавіка. Кошт замовы складае каля Br340 млн. Акрамя таго, да 9 мая завод плануе выпусціць кішэнныя гадзіннікі з сімволікай Перамогі і наручныя у выглядзе ордэна Перамогі. У цяперашні час абмяркоўваюцца аб'ёмы гэтых партый з заказчыкамі, распавёў Леў Мушкін. Віцебскі прыборабудаўнічы завод спецыялізуецца на выпуску наручных, кішэнных, настольных і наваенных гадзіннікаў, а таксама фурнітуры для абутковай і скурагалантарэйной прамысловасці. Гэтыя напрамкі займаюць у агульным аб'ёме вытворчасці адпаведна 30% і 70%. За 2009 год прадпрыемства выпусціла 58 тыс. гадзіннікаў на Br1,3 млрд. і 5,6 млн. адзінак рознай фурнітуры на Br2,5 млрд. Асартымент прадукцыі налічвае каля 500 відаў фурнітуры і больш за 100 мадэляў гадзіннікаў. Колькасць працаўнікоў - каля 400 чалавек.-0-