Віцебскі тэхналагічны ўніверсітэт будзе рыхтаваць спецыялістаў па прамысловай бяспецы

23 снежня, Віцебск /Сяргей Кочатаў - БЕЛТА/. Віцебскі дзяржаўны тэхналагічны ўніверсітэт з 2011 года ўпершыню арганізуе курсы павышэння кваліфікацыі па прамысловай бяспецы для спецыялістаў рэальнага сектара эканомікі, паведаміла карэспандэнту БЕЛТА дэкан факультэта павышэння кваліфікацыі і перападрыхтоўкі кадраў універсітэта, кандыдат эканамічных навук Ірына Семянчукова. Курс "Прамысловая бяспека" будзе весціся па шасці напрамках, прызваны садзейнічаць павышэнню тэарэтычнай падрыхтоўкі і пашырэнню практычных навыкаў спецыялістаў прадпрыемстваў, адказных за эксплуатацыю ліфтоў, кранаў і грузапад'ёмных машын, а таксама за перавозку небяспечных грузаў. У праграме курса плануецца вывучэнне пытанняў прававога рэгулявання забеспячэння бяспекі на прамысловых аб'ектах і аховы працы, вялікая ўвага ўдзяляецца вывучэнню навінак тэхналогій і абсталявання прамысловай вытворчасці, а таксама пытанням аўтаматызацыі тэхналагічных працэсаў. Для чытання лекцый па новым курсе будуць запрашацца ў асноўным практыкуючыя спецыялісты, атэставаныя дэпартаментам па наглядзе за бяспечным вядзеннем работ МНС, і прафесарска-выкладчыцкі склад ВДТУ. Слухачы змогуць не толькі павысіць узровень падрыхтоўкі, але і атрымаць кампетэнтныя парады ад спецыялістаў па канкрэтных праблемах, якія ім даводзіцца вырашаць у паўсядзённай практыцы. Праграма разлічана на 78 навучальных гадзін, па заканчэнні выпускнікам курсаў будуць выдавацца пасведчанні дзяржаўнага ўзору. Групы плануецца фарміраваць па 15 чалавек, а першы набор слухачоў прыступіць да вучобы ўжо ў студзені 2011 года. Яшчэ адной навінкай віцебскай ВНУ стане павышэнне кваліфікацыі па курсе "Распрацоўка, укараненне і падрыхтоўка да сертыфікацыі сістэмы менеджменту якасці (СМК) па стандарце СТБ ISO 9001-2009", разлічаным на спецыялістаў сістэмы адукацыі. "У бліжэйшыя год-два ўсе вышэйшыя і сярэднія спецыяльныя навучальныя ўстановы павінны ўкараніць СМК, таму мы вырашылі арганізаваць цэнтралізаваную падрыхтоўку спецыялістаў", - адзначыла Ірына Семянчукова. Акрамя таго, сама працэдура ўкаранення СМК прадугледжвае, што каля 75% работнікаў навучальнай установы павінны прайсці падрыхтоўку па гэтых пытаннях, і гэта робіць тэматыку курсаў вельмі актуальнай, дадала яна. Вучэбная праграма прадугледжвае вывучэнне асноў метадалогіі распрацоўкі і ўкаранення СМК, дакументальнага афармлення, правядзення ўнутраных аўдытаў і падрыхтоўкі да сертыфікацыі СМК навучальнай установы. Акрамя таго, універсітэт працягне весці павышэнне кваліфікацыі кіраўнікоў сумеснымі домаўладаннямі. Курс "Арганізацыя і кіраванне сумеснымі домаўладаннямі", уведзены ў пачатку 2010 года, прайшлі 110 старшынь таварыстваў уласнікаў і ЖСК, у тым ліку з іншых абласцей. ВДТУ плануе таксама актывізаваць узаемадзеянне з прадпрыемствамі па арганізацыі індывідуальных курсаў павышэння кваліфікацыі для спецыялістаў па канкрэтных напрамках, якія прадстаўляюць цікавасць для заказчыка. Напрыклад, цяпер у ВНУ завяршаюць павышэнне кваліфікацыі супрацоўнікі дэпартамента аховы МУС Беларусі, індывідуальная навучальная праграма таксама была распрацавана для канструктараў і тэхнолагаў віцебскага станкабудаўнічага завода "Вістан". -0-