Віцебскі завод водаачышчальнага абсталявання будзе пастаўляць ачышчальныя збудаванні для БелАЭС

Віцебскі завод водаачыстных збудаванняў УП «Палімерканструкцыя» выйграў два тэндэры на вытворчасць спецыялізаваных збудаванняў для Беларускай АЭС, якая будуецца ў Астраўцы Гродзенскай вобласці. Пастаўку плануецца выканаць да лістапада бягучага года.

Першы кантракт прадугледжвае пастаўку ачысных збудаванняў вытворча-ліўневых сцёкаў у блочна-мадульным выкананні для энергаблока №1 БелАЭС, паведамілі «Віцебскім весткам» на заводзе. Выраб дадзенага комплексу – складаны тэхналагічны працэс. У яго ўцягнуты ўсе службы прадпрыемства, а наяўнасць нестандартных вузлоў вырабаў патрабуе індывідуальнага падыходу да іх выканання. Прызначанае для АЭС абсталяванне ўключае каналізацыйную помпавую станцыю прадукцыйнасцю 650 м3/г, блок даачысткі прадукцыйнасцю 60 м3/г, пясчаналоўкі і абсталяванне для акумулявальнага рэзервуара адстойніка.

Нягледзячы на тое, што для «Палімерканструкцыі» гэта першы досвед працы на аб'ектах атамнай энергетыкі, вядомы віцебскі вытворца вытрымаў у ходзе закупачнай працэдуры жорсткі адбор і паспяхова прайшоў чатырохмесячную праверку на адпаведнасць прад'яўленым патрабаванням, адзначылі на прадпрыемстве. Цяпер завод ужо гатовы да здачы аднаго з блокаў абсталявання па першым кантракце, які ў бліжэйшыя дні будзе прымаць камісія заказчыка.

Другі кантракт заключаны на пастаўку каналізацыйнай помпавай станцыі, прызначанай для перапампоўкі ачышчаных сцёкавых вод, яна таксама будзе ўстаноўлена на энергаблоку №1 БелАЭС. Цяпер спецыялісты прадпрыемства прыкладаюць намаганні, каб паскорыць вытворчы працэс і захаваць тэрміны пастаўкі абсталявання на аб'ект.

Сяргей Антонаў, «Віцебскія весці».