Віцебскі завод водаачышчальнага абсталявання будуе станцыі абезжалезвання ў Падмаскоўі

Завод водаачышчальнага абсталявання УП «Палімерканструкцыя» рэалізаваў на тэрыторыі Расіі чарговы праект па стварэнні станцыі абезжалезвання. Пабудаваны водазабор, якому прысвоены нумар 16, будзе забяспечваць чыстай пітной вадой чатыры мікрараёны падмаскоўнага горада Краснагорска.

Як паведамілі «Віцебскім весткам» на прадпрыемстве, у верасні адбылося афіцыйнае адкрыццё і запуск безнапорнай устаноўкі водападрыхтоўкі прадукцыйнасцю 8 тыс. куб. м/сут. Канструкцыя станцыі абезжалезвання і габарыты будынка прадугледжваюць магчымасць яе павелічэння да 13 тыс. куб. м/сут. У аснову тэхналогіі, распрацаванай віцебскімі спецыялістамі, пакладзены безрэагентны аэрацыйны метад, дзякуючы якому зыходныя паказчыкі вады даводзяцца да патрабаваных па санітарных правілах і нормах. Акрамя таго, распрацоўка віцебскіх вытворцаў дазваляе звесці да мінімуму эксплуатацыйныя выдаткі за кошт поўнай аўтаматызацыі тэхналагічнага працэсу, мінімальных затрат на энергаспажыванне і шэрагу іншых канструктыўных асаблівасцей абсталявання.

У актыве «Палімерканструкцыі» гэта ўжо другая дзеючая станцыя водападрыхтоўкі ў Краснагорску (першы аб'ект эксплуатуецца з верасня 2014-га), а ў перспектыве яшчэ на двух водазаборных вузлах гэтага горада будзе ўстаноўлена водаачышчальнае абсталяванне віцебскай вытворчасці. Усяго ж за 15 гадоў прадпрыемства рэалізавала каля 800 праектаў па водазабеспячэнні і водаадвядзенні ва ўсіх абласцях Беларусі і ў 27 рэгіёнах Расіі.

Сяргей Антонаў, «Віцебскія весці».