«Віцебскхлебпрам» накіруе ў 2011 годзе на тэхпераўзбраенне каля Br11 млрд.

25 студзеня, Віцебск /Вольга Багачова - БЕЛТА/. РУВП "Віцебскхлебпрам" інвестуе ў 2011 годзе ў развіццё вытворчасці каля Br11 млрд., паведамілі карэспандэнту БЕЛТА на прадпрыемстве. Сродкі будуць накіраваны на набыццё новага абсталявання, якое дазволіць знізіць энергаёмістасць працы прадпрыемстваў, пашырыць асартымент і павысіць якасць выпускаемай прадукцыі. Так, Віцебскі хлебазавод плануе ў першым квартале ўвесці ў эксплуатацыю новую італьянскую лінію магутнасцю каля 5 т прадукцыі ў месяц. На ёй будуць выпускацца сухарна-баранкавыя вырабы (італьянскія сушкі і палачкі). Буйны інвестпраект коштам Br1,5 млрд. трэба будзе рэалізаваць Полацкаму хлебазаводу. Тут плануецца замяніць дзеючую печ і ўсталяваць аўтаматызаваную лінію па вытворчасці подных і жытніх гатункаў хлеба. Глыбокскі і Аршанскі хлебазаводы на працягу года маюць намер цалкам перааснасціць кандытарскія цэхі, захаваўшы іх магутнасці. Мадэрнізацыя гэтых вытворчасцей дазволіць у 1,5 раза пашырыць асартымент салодкіх прадуктаў, палепшыць якасць выпускаемых вырабаў. Шэраг прадпрыемстваў "Віцебскхлебпрама" ў бягучым годзе рэалізуюць мерапрыемствы па павышэнні энергаэфектыўнасці. Напрыклад, Лепельскі хлебазавод плануе замяніць дзеючую састарэлую печ на менш энергаёмістую з расстойной камерай, што дазволіць знізіць энергазатраты на 20%. Докшыцкі хлебазавод з гэтай жа мэтай мае намер замяніць кампрэсарнае абсталяванне. Эканомія ад рэалізацыі гэтага праекта складзе Br28 млн. у год. Тэрмін акупнасці - тры гады. За 2010 год прадпрыемствы "Віцебскхлебпрама" вырабілі 56,3 тыс. т хлебабулачных і 1,6 тыс. т кандытарскіх вырабаў на Br150,6 млрд., або 110,6% да ўзроўню папярэдняга года. На экспарт у Расію пастаўлена прадукцыі на $900 тыс. Рэнтабельнасць рэалізацыі па выніках года - 6,7%. Інвестыцыі ў асноўны капітал склалі Br20,5 млрд. У склад РУВП "Віцебскхлебпрам" уваходзяць 11 хлебазаводаў, будаўніча-мантажнае прадпрыемства "Віцебскхлеббуд" і сельскагаспадарчае прадпрыемства "Пражэктар". Сярэдне-спісачная колькасць работнікаў прадпрыемства - больш за 2,8 тыс. чалавек.-0-