Віцэ-прэм'ер Уладзімір Сямашка: Усе праекты ААТ «Нафтан» павінны быць завершаны ў 2016-2017 гадах

Наваполацкаму ААТ «Нафтан» неабходна завяршыць тэхнічнае пераўзбраенне ва ўстаноўленыя тэрміны, каб адпавядаць сусветным тэндэнцыям развіцця галіны і павысіць канкурэнтаздольнасць прадукцыі на знешніх рынках. На гэтым акцэнтаваў увагу намеснік прэм’ер-міністра Беларусі Уладзімір Сямашка, які наведаў найбуйнейшае прадпрыемства краіны падчас рабочай паездкі па Віцебшчыне.

— У мяне ёсць перакананне, што ў 2016-2017 гадах усе намечаныя праекты будуць завершаны ў адпаведнасці з новымі зацверджанымі графікамі работ, гэта рэальна, — адзначыў віцэ-прэм’ер, адказваючы на пытанне аб ходзе выканання праграмы мадэрнізацыі.

У той жа час ён параўнаў сітуацыю на двух нафтаперапрацоўчых заводах краіны не на карысць «Нафтана», канстатаваўшы, што на Мазырскім НПЗ па выніках работы за мінулы год фінансава забяспечылі рэалізацыю ўсіх сваіх праграм за кошт прыбытку. Мазыр, па словах Уладзіміра Сямашкі, сёння мае зусім іншую структуру так званага кошыка нафтапрадуктаў, якія цалкам адпавядаюць сусветным нормам і больш запатрабаваны на рынку. Таму галоўная задача навапалачан – завяршыць тэхнічнае пераўзбраенне, як бы складана ні было, параўнацца з Мазыром па глыбіні перапрацоўкі і якасці нафтапрадуктаў, а па аб’ёме яны прыкладна аднолькавыя.

«Дапамагаць, безумоўна,будзем. Напрыклад, прынялі рашэнне забіраць з «Нафтана» мазут і выкарыстоўваць яго ў сістэме «Мінэнерга» ў якасці альтэрнатыўнага паліва: у складаных умовах гэта дае пэўныя дывідэнды і рэспубліцы, і прадпрыемству. Але трэба памятаць, што магчымасці рэспублікі не безмежныя. Бюджэт фарміруецца ў рэгіёнах, яго напаўняльнасць залежыць ад эфектыўнай працы рэальнага сектара эканомікі. Таму адказы на многія пытанні варта шукаць на месцах, а не разлічваць на «залаты дождж», які пральецца зверху», — сказаў намеснік прэм'ер-міністра.

На сённяшні дзень, як растлумачыў генеральны дырэктар ААТ «Нафтан» Уладзімір Траццякоў, будуюцца сем новых установак, якія прадугледжваюць паляпшэнне тэхналагічных працэсаў. Вядома, гэта велізарны аб'ём працы і фінансаў, неабходных для іх узвядзення. Асноўнай пагрозай з'яўляецца змяншэнне сродкаў, якія прадпрыемства зарабляе на знешніх рынках, з прычыны таго, што за два гады нафта ўпала ў цане больш чым у тры разы: са 110 да 30 долараў за барэль. Сапраўды гэтак жа знізіўся кошт нафтапрадуктаў.

Гэта падзенне было кампенсавана павелічэннем аб'ёмаў рэалізацыі на экспарт, але ў цэнавым выражэнні выручку ўсё роўна не ўдалося аднавіць. Таму цяпер, па словах Уладзіміра Канстанцінавіча, варта дзейнічаць, перш за ўсё, за кошт скарачэння тэрмінаў рэалізацыі інвестыцыйных праектаў і знаходжання дадатковых крэдытных рэсурсаў. Доля ўласных сродкаў, якія затрачваюцца на рэканструкцыю, — каля 70%.

— 2016 год, бясспрэчна, з'яўляецца ключавым для «Нафтана», таму што мы завяршаем будаўніцтва і здачу найважнейшых аб'ектаў,– падкрэсліў Уладзімір Траццякоў.

Увядзенне ў строй устаноўкі АТ-8 дазволіць павялічыць аб'ёмы першаснай перапрацоўкі нафты з дзеючых 10,8 да 12 мільёнаў тон. У гэтым годзе прадугледжваецца 11,6 млн тон у сувязі з тым, што завяршыць аб'ект заводчане маюць намер у верасні.

На снежань запланаваны пуск устаноўкі па вытворчасці вадароду. Адначасова скончыцца будаўніцтва ўстаноўкі па вытворчасці элементарнай серы метадам Клауса. Гэта экалагічны праект, які дазволіць наваполацам не проста выпускаць новую прадукцыю, а, у першую чаргу, гарантаваць паляпшэнне стану навакольнага асяроддзя.

Акрамя таго, у снежні будзе дзякуючы чаму чаго прадпрыемства зможа выпускаць большы аб'ём дызельнага паліва стандарта «Еўра-5» і палепшыць сваю эканоміку. А самым галоўным генеральны дырэктар назваў комплекс запаволенага каксавання нафтавых рэшткаў. Пасля яго запуску глыбіня перапрацоўкі вуглевадароднай сыравіны павялічыцца з цяперашніх 70 да 88%, з'явяцца дадатковыя аб'ёмы светлых нафтапрадуктаў, перш за ўсё, дызельнага паліва. Гэты працэс найбольш складаны і дарагі, паколькі звязаны з будаўніцтвам многіх дапаможных аб'ектаў.

 

Працоўныя сустрэчы з удзелам віцэ-прэм'ера, як адзначыў Уладзімір Траццякоў, мабілізуюць калектыў на выкананне задач, дазваляюць не толькі адрапартаваць аб зробленай працы, але і

ўбачыць праблемы, папрасіць дапамогу ў іншых арганізацый, міністэрстваў і ведамстваў. Да прыкладу, Міністэрства архітэктуры і будаўніцтва прыняло меры ў сувязі з вострым недахопам мантажнікаў, і цяпер на будаўнічых аб'ектах «Нафтана» працуюць рабочыя адпаведных спецыяльнасцей з усіх рэгіёнаў краіны.

Ларыса Малашаня. «Віцебскія весці». Фота Любові Дарагуш.