«Уладароў сяла» вызначаць у абласцях Беларусі да 15 жніўня

19 ліпеня, Мінск /Кар. БЕЛТА/. Рэгіянальныя туры сямейнага сельскагаспадарчага праекта БРСМ "Гаспадар сяла-2012" завершацца да 15 жніўня. Аб гэтым карэспандэнту БЕЛТА паведаміла каардынатар праекта, другі сакратар Цэнтральнага камітэта грамадскага аб'яднання "Беларускі рэспубліканскі саюз моладзі" Альбіна Сычэўская. У конкурсе прымаюць удзел муж і жонка ва ўзросце да 31 года і іх дзеці. У абласных турах будуць спаборнічаць сем'і, якія атрымалі перамогу на раённых конкурсах, што стартавалі 1 чэрвеня. Фінал пройдзе падчас рэспубліканскага фестывалю-кірмашу працаўнікоў вёскі "Дажынкі-2012" у Горках, сюды прыедзе шэсць сем'яў-пераможцаў раённых і абласных этапаў конкурсу. Як расказала Альбіна Сычэўская, сёлета зменены крытэрыі падвядзення вынікаў "Гаспадара сяла". "Дадаткова будуць улічвацца наяўнасць у сям'і асабістай падворка, аб'ёмы рэалізаванага перапрацоўчым і нарыхтоўчым арганізацыям мяса, малака, іншай сельскагаспадарчай прадукцыі", - удакладніла яна. Акрамя таго, у разлік будзе прымацца праца дарослых удзельнікаў у сельгаспрадпрыемствах па спецыяльнасцях, актыўны ўдзел у грамадскім жыцці калектыву, перамогі сем'яў у іншых спартыўных, творчых конкурсах. Штогод "Гаспадар сяла" аб'ядноўвае сотні маладых сем'яў, якія пражываюць у сельскай мясцовасці і працуюць у сельгаспрадпрыемствах не менш за тры гады. Упершыню конкурс стартаваў у Глыбоцкім раёне ў 2007 годзе. З 2008-га маладзёжная ініцыятыва рэалізуецца ва ўсіх рэгіёнах краіны. Галоўная мэта праекта - замацаваць маладыя сем'і на вёсцы, падняць прэстыж сельскагаспадарчых прафесій, папулярызаваць традыцыі беларускай вёскі, сфарміраваць здаровы лад жыцця ў маладзёжным асяроддзі. Арганізатарам рэспубліканскага сямейнага сельскагаспадарчага праекта "Гаспадар сяла" выступае Беларускі рэспубліканскі саюз моладзі пры падтрымцы Міністэрства сельскай гаспадаркі і харчавання, ААТ "Белаграпрамбанк".-0-