У Наваполацку абмяркуюць укараненне энергаэфектыўных тэхналогій у будаўніцтве і ЖКГ

Першая Наваполацкая навукова-практычная канферэнцыя "Павышэнне энергаэфектыўнасці жылых будынкаў і іншых аб'ектаў пры іх праектаванні, будаўніцтве і эксплуатацыі. Вопыт і перспектывы выкарыстання аднаўляльных крыніц энергіі" пройдзе 10 снежня ў нафтаградзе, паведамілі ў мясцовым гарвыканкаме.

Удзельнікі мерапрыемства - спецыялісты з вобласці і Мінска - абмяняюцца інфармацыяй у сферы энергазберажэння, параўнаюць фактычны эфект ад энергазберагальных мерапрыемстваў, рэалізаваных у Наваполацку, з вынікамі падобных мерапрыемстваў па ўсёй Беларусі, у тым ліку з улікам сусветнага вопыту. Напрыклад, гарадское прадпрыемства ЖКГ прадставіць вынікі эксплуатацыі энергаэфектыўных дамоў з пакватэрным улікам цяпла ў Наваполацку, а спецыялісты Полацкага дзяржуніверсітэта прывядуць прыклады правядзення энергааўдытаў на прадпрыемствах жыллёва-камунальнай гаспадаркі. Досведам выкарыстання цеплавых помпаў і геліявадародных установак на сваіх аб'ектах падзеляцца прадпрыемства "Наваполацкводаканал" і ААТ "Полацктранснафта "Дружба". Аб практычных выніках укаранення комплексу па зборы і ўтылізацыі смеццевага біягазу на палігоне цвёрдых камунальных адходаў раскажа галоўны інжынер СТАА "Вірэа Энерджы".

Па выніках канферэнцыі будуць выпрацаваны стратэгія практычнага ўзаемадзеяння ў абмяркоўваемай сферы паміж органамі дзяржкіравання, суб'ектамі гаспадарання і навуковымі ўстановамі на 2016 год, а таксама рэкамендацыі па павышэнні эфектыўнасці працы праектных, будаўнічых і эксплуатацыйных арганізацый у сферы стварэння энергаэфектыўнага жылля і выкарыстання аднаўляльных крыніц энергіі.

Кацярына Князева, БЕЛТА.