Пытанні падрыхтоўкі кваліфікаваных рабочых кадраў актуальныя для любой краіны - меркаванне спецыяліста

7 снежня, Віцебск /Вольга Багачова - БЕЛТА/. Пытанні падрыхтоўкі кваліфікаваных рабочых кадраў маюць велізарнае значэнне для любой краіны. Такое меркаванне выказаў карэспандэнту БЕЛТА начальнік упраўлення адукацыі Віцебскага аблвыканкама Іван Шчурок. Аб неабходнасці надаць сур'ёзную ўвагу якасці адукацыі на IV Усебеларускім народным сходзе заявіў Прэзідэнт Беларусі. "З улікам задач, якія стаяць перад краінай на наступнае пяцігоддзе, гэта абсалютна правільна. Пры гэтым неабходна павысіць якасць як дашкольнай, школьнай, так і сярэдняй спецыяльнай, прафесійна-тэхнічнай і вышэйшай адукацыі", - падкрэсліў Іван Шчурок. Гонар педагогаў выклікалі словы кіраўніка дзяржавы аб высокім узроўні сістэмы прафесійна-тэхнічнай адукацыі (ПТА), якая склалася ў Беларусі. "Бо былі моманты, калі вітала думка аб неабходнасці прадаць аб'екты, вытворчыя плошчы ПТА, знаходзіліся камерсанты, гатовыя іх набыць. Аднак варта аддаць належнае нашым органам улады, якія не пайшлі на гэта, захаваўшы матэрыяльна-тэхнічную базу", - нагадаў начальнік упраўлення, адзначыўшы, што правільнасць гэтага рашэння пацвердзіла жыццё. Сёння Беларусь сама забяспечвае ўсе свае патрэбы ў кваліфікаваных спецыялістах па розных рабочых прафесіях. Пры гэтым вучыцца да нас едзе і моладзь з іншых краін. Іван Шчурок выказаў упэўненасць, што сродкі, укладзеныя ў эканоміку за мінулыя пяць гадоў, дадуць вынік і стануць добрай асновай для далейшага развіцця галін народнай гаспадаркі краіны. Галоўныя ж прыярытэты наступнага перыяду жыцця Беларусі - сям'я-здароўе-адукацыя - сведчаць аб накіраванасці на паляпшэнне жыцця людзей. "Таму нам трэба будзе зрабіць усё, каб намечаныя мэты былі выкананы, бо ад гэтага залежыць дабрабыт нашага народа", - заключыў ён.-0-