Жыхары Віцебска атрымалі магчымасць зрабіць самы дакладны і поўны аналіз крыві на найноўшым абсталяванні ў паліклініцы №1

Сёння ў гарадскіх паліклініках з улікам перааснашчэння ёсць магчымасць праводзіць самыя сучасныя даследаванні.

Клініка-дыягнастычная лабараторыя ў любой лячэбнай установе толькі называецца дапаможнай службай. На справе гэта самае што ні ёсць ключавое звяно ў лячэбным працэсе, без яе даследаванняў урачы абысціся не могуць. А калі яна аснашчана па апошнім слове сучаснай тэхнікі, як гэта зроблена за апошні час у гарадской паліклініцы №1 на вуліцы Церашковай, 30, дык і зусім значэнне гэтага падраздзялення пераацаніць цяжка.

Разам з загадчыцай лабараторыяй Жаннай Маскінай адпраўляемся ў святая святых лабараторнай дыягностыкі. Жанна Анатолеўна са знаннем справы і энтузіязмам, уласцівым фанатычна адданым сваёй прафесіі людзям, распавядае пра найноўшае абсталяванне, якое ператварыла руцінны працэс у высокатэхналагічныя аперацыі.

— З верасня гэтага года ў нас працуе біяхімічны аналізатар іспанскай вытворчасці, пры стварэнні якога прымянялася інавацыйная оптыка на базе даўгавечных святлодыёдаў (LED). Усё тут робіцца і мыецца аўтаматычна. У аналізатар адначасова загружаецца да 135 проб крыві, рэагенты, дарэчы, арыгінальныя, дазуюцца вельмі эканомна. За гадзіну інтэлектуальная машына, працу якой чалавек толькі кантралюе, але не ўмешваецца, калі працэс праграмай ужо запушчаны (залог дакладнасці дадзеных!), апрацоўвае 400 тэстаў. Такая магутнасць дазволіла выконваць даследаванні для гарадскіх паліклінік. Пакуль на стартавым этапе біяматэрыял у асноўным тэстуецца па 25 асноўных біяхімічных паказчыках, уключаючы дыягностыку анеміі, астэапарозу, вызначэнне ліпіднага спектру крыві і іншае. Далей жыццё падскажа, якія навацыі будуць яшчэ запатрабаваны шырокім колам пацыентаў.

І гэта далёка не ўсё. Імунаферментны аналізатар ААТ «Віцязь» лёгка раскладвае па паліцах гарманальны статус пацыента, уключаючы онкамаркер ПСА для прадухілення сур'ёзных хвароб мужчынскай палавой сферы. Аналізатар глікаванага гемаглабіну незаменны ў дыягностыцы і маніторынгу цукровага дыябету, а гематалягічны японскай вытворчасці ўсяго за хвіліну выдае паказчыкі агульнага аналізу крыві. Толькі вызначэнне ШАС падаўжае атрыманне выніковага выніку да гадзіны.

Да магчымасцей высокатэхналагічнага абсталявання, на якім працуе навучаны персанал, трэба дадаць зручную арганізацыю працэсу. Любы чалавек можа звярнуцца ў лабараторыю па тэлефоне 55-59-55 і замовіць за прымальную, па дзяржрасцэнках, плату патрэбны яму пералік даследаванняў, прайсці іх у той жа дзень пасля абеду. У выпадку, калі пацыент не мае накіравання лекара і выразна не вызначыўся з аб'ёмам аналізаў сам, яго бясплатна пракансультуе па відах, а затым і па атрыманых выніках лекар лабараторнай дыягностыкі. Тэрмін выканання замовы складае ад 1 гадзіны (гематалогія і біяхімія) да 3—5 дзён (даследаванні на гармоны). Так што абсталяванне паліклінікі цалкам дазваляе канкурыраваць з прыватнымі медыцынскімі лабараторыямі, дзе часам толькі ажыццяўляецца забор біялагічнага матэрыялу. У цэнах такіх паслуг яе перавага відавочная.

Тут таксама ідуць па шляху распрацоўкі праграм комплекснага абследавання пацыентаў. Ужо гатовыя такія пакеты, як «Жанчына 40+», «Мужчына 40+», «Залішняя маса цела», «Будучая мама» і іншыя. Гэты падыход дазваляе хутка і дакладна ацаніць стан здароўя.

Укладанне грошай у найноўшыя тэхналогіі дыягностыкі і лячэння дае эфект. Па словах галоўнага ўрача цэнтральнай гарадской паліклінікі Станіслава Цітовіча, толькі за 9 месяцаў гэтага года на закупку абсталявання для ўстаноў аховы здароўя Віцебска затрачана амаль 4,8 мільярда рублёў з рэспубліканскага і мясцовага бюджэтаў прыкладна ў роўных долях. Ад аказання платных паслуг на гэтыя мэты накіравана
138 мільёнаў. І праца працягваецца.

Вера Мурашкіна. Фота Алега Клімовіча. «Віцьбічы».