Выявіць праблематыку і дапамагчы: Наталля Качанава наведала карэкцыйны цэнтр у Полацку
У Полацку на выязным пасяджэнні кансультатыўнага савета пры Савеце Рэспублікі па пытаннях сацыяльнай адаптацыі і інтэграцыі дзяцей з асаблівасцямі псіхафізічнага развіцця Наталля Качанава наведала карэкцыйны цэнтр, пагутарыла з яго кіраўніком, педагогамі, дзецьмі і іх бацькамі. Установу адукацыі наведваюць 123 дзіцяці Полацкага раёна. Тут функцыянуюць пяць груп дашкольнага профілю і пяць спецыяльных класаў для дзяцей школьнага ўзросту. Рэабілітацыю і сацыяльную адаптацыю ў цэнтры праходзяць дзеці ад нараджэння да 18 гадоў з аўтыстычнымі засмучэннямі і цяжкімі формамі інваліднасці. Да пачатку гэтага навучальнага года цэнтру перадалі ўсе плошчы былога дзіцячага сада, і цяпер у цэнтры ёсць свой спортзал і басейн. "У новых памяшканнях трэба правесці капітальны рамонт, бо мы сваімі сіламі змаглі зрабіць толькі касметычны рамонт, і для дзяцей з аўтыстычнымі засмучэннямі неабходна дакупіць навучальнае абсталяванне", - сказала дырэктар цэнтра Ганна Кавалёва, адзначыўшы, што ўстанове адукацыі дапамагаюць мясцовыя ўлады, партнёры, валанцёры і неабыякавыя грамадзяне.
Яна таксама расказала старшыні Савета Рэспублікі, што пад патранатам цэнтра знаходзяцца больш за 2,3 тыс. дзяцей з асаблівасцямі псіхафізічнага развіцця, якія пражываюць у Полацкім раёне. Наталля Качанава пацікавілася, у якім узросце ў дзяцей выяўляюць такія парушэнні, як ідзе падрыхтоўка і перападрыхтоўка педагогаў, ці хапае спецыялістаў вузкага профілю, наколькі наладжана супрацоўніцтва з бацькамі. "Нам важна ведаць, якія ёсць праблемы ў такіх установах адукацыі, і своечасова дапамагчы ім. Гэта павінна быць міжведамасная дапамога - і адукацыі, і аховы здароўя, і мясцовых улад, і прадпрыемстваў рэгіёна", - адзначыла старшыня Савета Рэспублікі. Наталля Качанава ўручыла выхаванцам цэнтра падарункі і ў адказ атрымала шчырую падзяку юных палачан.
Наталля Качанава
У выязным пасяджэнні прынялі ўдзел міністр адукацыі Андрэй Іванец, міністр аховы здароўя Дзмітрый Піневіч, міністр працы і сацыяльнай абароны Ірына Касцевіч, кіраўніцтва Полацкага раёна, педагагічная грамадскасць.
"БЕЛТА"