«Заборскі фэст» стане «гваздком» аграэкатурыстычнага сезона на Віцебшчыне

Знакаміты фестываль сельскага турызму ў Расонскім раёне, упершыню праведзены яшчэ ў 2005 годзе і паступова здаўшы свае пазіцыі, сёлета ўключаны ў план мерапрыемстваў рэспубліканскага маштабу.

Акрамя таго, "Заборскі фэст" стане адной з галоўных падзей аграэкатурыстычнага сезона на Віцебшчыне. План мерапрыемстваў на гэты год складзены і зацверджаны на справаздачна-выбарным пасяджэнні грамадскага савета па развіцці аграэкатурызму вобласці.

Яшчэ адным ключавым мерапрыемствам можна назваць IV злёт аграэкасядзіб вобласці, які з'яўляецца своеасаблівай візітнай карткай нашага рэгіёну – нідзе больш падобнага не праводзіцца. Ён запланаваны на 6-7 верасня ў сядзібе "Славяначка", што ў гарпасёлку Баравуха-1 (Полацкі раён).

Найбліжэйшым жа ў планах значыцца навучальны семінар для суб'ектаў аграэкатурызму (31 сакавіка). Чакаюцца таксама мерапрыемствы, праводзімыя ў рамках міжнароднага праекта "Бела Кузіна" і праекта "Малыя рэкі – вялікія праблемы: працуем разам над абаронай і будучыняй малых рэк басейна ракі Дзісна", БГА "Адпачынак у вёсцы", супрацоўніцтва і абмен вопытам з партнёрамі з Літвы, Латвіі, Расіі.

Прадоўжана будзе традыцыя выбару лепшай аграэкасядзібы (дарэчы, на пачатак года на Віцебшчыне іх зарэгістравана ўжо 449).

Самым насычаным стане летні сезон: адбудуцца "Акадэмія лёну" ў Браслаўскім раёне, народнае свята "Купалле", тыднёвы практычны семінар "Летнік рамёстваў" – у Мёрскім, "Фестываль мастацтва і рамёстваў "Вялікі Поўсвіж" – у Лепельскім і іншыя. Але і восенню сядзібы парадуюць мерапрыемствамі, напрыклад, Ала Харэнь запрашае да сябе на Расоншчыну ў кастрычніку – на фестываль "Дары лесу".

Таксама па выніках пасяджэння старшынстваваць у грамадскім савеце працягне Віктар Ерашоў. А акрамя таго, адбыліся невялікія карэкціроўкі ў складзе, каб узмацніць прадстаўніцтва найбольш актыўных у сферы сельскага турызму раёнаў.

– Нават падводзячы вынікі і прызнаючы працу ў мінулым годзе здавальняючай, мы адзначаем недахоп ініцыятывы і раз'яднанасць сярод суб'ектаў аграэкатурызму, – сказаў Віктар Ерашоў. – Па кааперацыі нам яшчэ трэба папрацаваць. Спадзяюся, злёт сядзіб і іншыя мерапрыемствы гэтаму паспрыяюць.

Кацярына Князева, "Віцебскія весці"