Клопат аб ветэранах з'яўляецца прыярытэтнай задачай улад - А.Косінец

7 мая, Віцебск /Вольга Багачова - БЕЛТА/. Клопат пра ветэранаў з'яўляецца прыярытэтнай задачай улады, заявіў сёння старшыня Віцебскага аблвыканкама Аляксандр Косінец на ўрачыстым прыёме з нагоды Дня Перамогі, перадае карэспандэнт БЕЛТА. Ушаноўваючы ветэранаў Вялікай Айчыннай вайны, Аляксандр Косінец падкрэсліў, што Дзень Перамогі з'яўляецца знамянальнай датай для беларускага народа. Перамога дасягнута дарагой цаной: кожны трэці ўраджэнец Прыдзвінскага краю загінуў, не дачакаўшыся яе. "Па-рознаму складаўся баявы шлях кожнага з вас. Пра гэта сведчыць і сённяшні склад удзельнікаў нашай сустрэчы, сярод якіх франтавікі, партызаны, падпольшчыкі. Аб'ядноўвае вас усіх адно: найвялікшае званне - Пераможцы", - сказаў старшыня аблвыканкама. У Віцебскай вобласці пражываюць 4420 ветэранаў ВАВ. "Улада рабіла і будзе рабіць усё неабходнае, каб акружыць кожнага клопатам, увагай, аказаць усялякую дапамогу па ўсіх напрамках, бо вы ўносіце каласальны ўклад у ваенна-патрыятычнае выхаванне моладзі, гуляеце велізарную ролю ў стваральным працэсе, з'яўляецеся стрыжнем і цэментуючай сілай нашага грамадства", - сказаў кіраўнік вобласці. Ён асабліва падкрэсліў, што подзвіг ветэранаў даў магчымасць жыць у свабоднай краіне, ствараць, будаваць, развіваць яе для будучых пакаленняў. Па выніках першага квартала 2012 года Віцебская вобласць займае лідзіруючыя пазіцыі сярод рэгіёнаў рэспублікі па тэмпах росту валавога рэгіянальнага прадукту, вытворчасці прамысловай прадукцыі, рознічным тавараабароце, інвестыцыях у асноўны капітал, экспарце тавараў і паслуг, сальда знешняга гандлю таварамі без уліку нафты і нафтапрадуктаў, удзельнай вазе інавацыйнай прадукцыі ў агульным аб'ёме адгружанай, мэтавым паказчыку па энергазберажэнні. Па галоўным паказчыку эфектыўнасці работы - валавым рэгіянальным прадукце - забяспечаны тэмп росту 121,2% да студзеня-сакавіка 2011 года, па валавой прадукцыі сельскай гаспадаркі - 104,9%. За тры месяцы бягучага года ўведзена ў дзеянне 118,8 тыс.кв.м жылля. У вобласці штогод праводзяцца абследаванні ўмоў пражывання ветэранаў вайны. У 2011 годзе 1113 ветэранам вайны аказана дапамога ў рамонце жылых памяшканняў, печаў, электраправодкі. На гэтыя мэты было накіравана Br222,3 млн. У першым квартале 2012-га дапамаглі з рамонтам 14 ветэранам. Акрамя таго, у 2011 годзе палепшаны жыллёвыя ўмовы васьмі ветэранаў. Розныя віды сацыяльна-бытавой і псіхалагічнай дапамогі аказваюцца гэтай катэгорыі грамадзян праз тэрытарыяльныя цэнтры сацыяльнага абслугоўвання насельніцтва, якія адкрыты ва ўсіх 27 адміністрацыйных раёнах вобласці.-0-