Навошта і як кіраўніку фарміраваць асабісты брэнд - распавялі моладзі, якая ўваходзіць у перспектыўны кадравы рэзерв Віцебскага аблвыканкама
На мерапрыемстве, якое праходзіла ў Віцебску і доўжылася пяць дзён, сабралася звыш 20 маладых людзей, якія знаходзяцца ў перспектыўным кадравым рэзерве аблвыканкама. Для іх правялі семінары і трэнінгі, чыталі лекцыі, якія тычацца арганізацыі дзейнасці кіраўніка і ўзначаленага ім калектыву, пазіцыянавання сваёй працы ў сродках масавай інфармацыі і грамадстве, умення выступаць публічна і змагацца са стрэсам.
— Рэбята прыехалі з усёй Віцебшчыны. Яны працуюць у розных сферах, пачынаючы ад сельскай гаспадаркі і ЖКГ і заканчваючы ўстановамі культуры. У будучыні многія здольныя стаць кіраўнікамі высокага ўзроўню. Таму павінны пастаянна развівацца і авалодваць новымі ведамі і навыкамі. Дадзеныя курсы ў гэтым плане — выдатная магчымасць, — сказала галоўны спецыяліст галоўнага ўпраўлення арганізацыйна-кадравай работы аблвыканкама Ларыса Каранько. — Сакрэтамі поспеху маладога кіраўніка з удзельнікамі падзяліліся кіраўнік Сенненскага райвыканкама Ігар Мароз і намеснік старшыні Віцебскага гарвыканкама Віктар Глушын. Таксама пра свой вопыт расказалі памочнік Прэзідэнта Рэспублікі Беларусь — інспектар па Віцебскай вобласці Анатоль Ліневіч, прадстаўнікі абласной улады, выкладчыкі абласнога інстытута развіцця адукацыі і ВДУ ім. П. Машэрава.
Вялікую цікавасць выклікаў круглы стол, на якім разбіралі, навошта і як кіраўніку фарміраваць асабісты брэнд. Спікерамі выступілі ўраджэнцы Віцебшчыны да 35 гадоў, якія дамагліся значных вышынь у сваіх сферах дзейнасці — кіраўнік Digital-агенцтва LAPIN Андрэй Лапін, генеральны дырэктар Цэнтра культуры «Віцебск», дырэктар Міжнароднага фестывалю мастацтваў «Славянскі базар у Віцебску» Глеб Лапіцкі і першы сакратар абласнога камітэта БРСМ Вячаслаў Хрол.
— Я падзяліўся са слухачамі сакрэтамі, як выкарыстоўваць сацыяльныя сеткі для прасоўвання карпаратыўных інтарэсаў, пазіцыянавання і пошуку кваліфікаваных кадраў, — удакладніў Андрэй Лапін. — Дзяржслужачыя павінны зразумець, што яны, па вялікім рахунку, не адрозніваюцца ад топ-менеджараў прыватных кампаній і таксама сёння маюць патрэбу ў прасоўванні асабістага брэнда, каб дасягаць высокіх вынікаў і прасоўвацца па кар'ернай лесвіцы.