Тавары для асабістага карыстання замежнага паходжання. Віцебская мытня патлумачыла новыя правілы ўвозу тавараў грамадзянамі праз беларускую мяжу

З 10 сакавіка Дзяржаўны мытны камітэт Рэспублікі Беларусь змяніў падыходы да аднясення тавараў, якія перамяшчаюцца праз мяжу фізічнымі асобамі, да тавараў для асабістага карыстання. Больш падрабязна пра гэта «Віцебскім весткам» распавёў намеснік начальніка мытні па арганізацыі мытнага афармлення і кантролю Віцебскай мытні Сяргей Самушэў.

— Сяргей Эдуардавіч, якія асаблівасці маюць новаўвядзенні?

— Раней пры прыняцці рашэння аб аднясенні да тавараў для асабістага карыстання ўвозімых прадметаў доўгага карыстання мытным органам прымалася станоўчае рашэнне, калі кожны з такіх тавараў увозіцца ў колькасці не больш за адну адзінку не часцей, чым адзін раз на працягу каляндарнага года. З 10 сакавіка 2015 года такое рашэнне можа быць прынята, калі такія тавары ў той жа колькасці ўвозяцца не часцей, чым адзін раз на працягу трох каляндарных гадоў, за выключэннем тавараў доўгага карыстання, увезеных з аплатай сукупнага мытнага плацяжу. Чытачы могуць азнаёміцца з метадычнымі рэкамендацыямі па вызначэнні прызначэння і кошту тавараў, якія перамяшчаюцца фізічнымі асобамі, на інтэрнэт-сайце Дзяржаўнага мытнага камітэта Рэспублікі Беларусь www.gtk.gov.by у рубрыцы «Падарожнікам».

— Змены дзейнічаюць з 10 сакавіка бягучага года, аднак у іх указана, што вылічэнне тэрмінаў ажыццяўляецца з 31 сакавіка 2014 года. Ці значыць гэта, што тыя, хто ўвёз нешта з бытавой тэхнікі або сантэхнікі за гэты прамежак часу па старых правілах, ужо маюць у заліку бяспошлінны ўвоз?

— Так. Калі чалавек, напрыклад, у красавіку мінулага года ўвёз варачную паверхню, то для яго ўжо пайшоў адлік з моманту ўвозу тавару: 3 гады. Толькі па заканчэнні гэтага перыяду службовыя асобы мытні будуць прымаць рашэнне аб аднясенні ўвозімых тавараў да тавараў для асабістага карыстання.

— А калі чалавек ужо паспеў увёзці, скажам, 2-3 варачныя паверхні — для сябе, бацькоў і сяброў. Ці будзе праведзены які-небудзь дадатковы пераразлік за другую і наступныя адзінкі?

— Калі ўвезеныя раней тавары пры ўвозе былі аднесены службовымі асобамі мытні да тавараў для асабістага карыстання і ў далейшым гэтыя тавары былі выкарыстаны для асабістых, сямейных, хатніх і іншых, не звязаных з ажыццяўленнем прадпрымальніцкай дзейнасці, патрэб фізічных асоб, ніякіх праблем не ўзнікне. Але калі будзе ўстаноўлена, што пад выглядам тавараў для асабістага карыстання ўвозіліся тавары з мэтай іх наступнай рэалізацыі, яны будуць лічыцца незаконна перамешчанымі таварамі з усімі выцякаючымі наступствамі ў адпаведнасці з пунктам 4 артыкула 3 Пагаднення аб парадку перамяшчэння фізічнымі асобамі тавараў для асабістага карыстання праз мытную мяжу Мытнага саюза і здзяйснення мытных аперацый, звязаных з іх выпускам.

Калі зараз чалавек увязе яшчэ адну варачную паверхню, а папярэдняя ўвозілася ў перыяд з 31 сакавіка 2014 года, службовай асобай мытні будзе прынята рашэнне аб адмове ў выпуску ў сувязі з неаднесенасцю гэтага вырабу да тавараў для асабістага карыстання і рэкамендавана альбо ажыццявіць яго вываз за межы мытнай тэрыторыі Еўразійскага эканамічнага саюза, альбо змясціць пад мытную працэдуру мытнага транзіту ў адным з ведамасных пунктаў мытнага афармлення. Далей прадугледжаны механізм у такім жа парадку, як для суб'ектаў гаспадарання ў дачыненні да тавараў у гандлёвым абароце: неабходнасць падрыхтоўкі і падачы дэкларацыі на тавары, выкананне ўстаноўленых забаронаў і абмежаванняў і г.д.

Разам з тым у дачыненні да непадзельных тавараў вагой больш за 35 кг заканадаўствам прадугледжаны сукупны мытны плацеж, аплата якога з'яўляецца абавязковай умовай для атрымання дазволу на ўвоз такога тавару. Калі раней, напрыклад, у снежні 2014 года фізічнай асобай была ўвезена пральная машына з аплатай сукупнага мытнага плацяжу, то машына не будзе ўлічвацца пры кантролі за увозам такога тавару адзін раз на працягу 3 каляндарных гадоў. Мытным органам таксама можа быць прынята рашэнне аб аднясенні другой увозімай пральнай машыны за бягучы перыяд да тавараў для асабістага карыстання, калі асобай будзе гэта даказана.

— Колькі будзе каштаваць другая пральная машына, калі за мяжой яна каштавала 300 еўра?

— Адзіным мытным тарыфам ЕАЭС на пральныя машыны ўстаноўлена стаўка ўвазной мытнай пошліны 11,7% ад мытнага кошту. Стаўка падатку на дададзеную вартасць, устаноўленая Падатковым кодэксам Рэспублікі Беларусь, складае 20%. Спачатку мы вызначаем памер мытнага кошту ў беларускіх рублях па курсе Нацыянальнага банка (напрыклад, на 17 сакавіка 2015 года курс еўра — 15800 рублёў). Такім чынам, мытны кошт складзе 300х15800 = 4 740 000 рублёў. Вызначыўшы мытны кошт, разлічваем памер мытнай пошліны: 4 740 000 х 11,7% = 554 580 рублёў. Асновай для налічэння падатку на дададзеную вартасць у дадзеным выпадку будзе сума мытнага кошту і мытнай пошліны, якая складзе 4 740 000 + 554 580 = 5 294 580 рублёў. Разлічваем памер падатку на дададзеную вартасць: 5 294 580 х 20% = 1 058 916 рублёў. У дачыненні да тавараў для асабістага карыстання, якія ўвозяцца з выплатай мытных плацяжоў, неабходна таксама выплаціць збор за здзяйсненне мытных аперацый. У дадзеным выпадку прадугледжана фіксаваная стаўка збору ў памеры 5 еўра. У пераліку на курс Нацыянальнага банка памер збору за здзяйсненне мытных аперацый складзе 5 х1 5800 = 79000 рублёў. Усяго агульная сума мытных плацяжоў: 554 580 + 1 058 916 + 79000 = 1 692 496 рублёў. Гэта значыць на гэту суму падаражэе пральная машына.

— Шмат жыхароў вобласці карыстаюцца паслугамі міжнародных паштовых адпраўленняў і экспрэс-дастаўкі. Значыць, на папулярныя кітайскія планшэты, набытыя такім спосабам, таксама распаўсюджваюцца ўведзеныя змены?

— Так. З 10 сакавіка 2015 года ў якасці тавараў для асабістага карыстання, без выплаты мытных плацяжоў, дапускаецца ўвоз толькі адной адзінкі планшэтнага камп'ютара на працягу трох каляндарных гадоў (разлік ажыццяўляецца з 31 сакавіка 2014 года). Другая і наступныя адзінкі ва ўказаны перыяд не будуць аднесены мытным органам да тавараў для асабістага карыстання. Выпуск такіх тавараў будзе ажыццяўляцца ў адпаведнасці з патрабаваннямі, устаноўленымі Мытным кодэксам Мытнага саюза для юрыдычных асоб і індывідуальных прадпрымальнікаў з размяшчэннем дадзеных тавараў пад мытныя працэдуры і прымяненнем для мэт мытнага дэкларавання дэкларацыі на тавары.

— А калі нехта чакае на днях пасылку, скажам, з двума недарагімі планшэтамі? Чалавек не ў курсе адбыўшыхся змен. Яму давядзецца аплаціць пошліну за другі? А таксама што рабіць таму, хто па недасведчанасці перасек мяжу з аналагічным наборам?

— Як тавар асабістага карыстання з вызваленнем ад выплаты мытных плацяжоў можна разглядаць толькі адзін планшэт. Грамадзяніну давядзецца вывезці дадзены тавар за межы мытнай тэрыторыі Еўразійскага эканамічнага саюза або размясціць пад адну з мытных працэдур, прадугледжаных Мытным кодэксам Мытнага саюза, у парадку, прадугледжаным для гандлёвага абароту.

Раім чытачам уважліва азнаёміцца з метадычнымі рэкамендацыямі па вызначэнні прызначэння і кошту тавараў, якія перамяшчаюцца фізічнымі асобамі, на інтэрнэт-сайце Дзяржаўнага мытнага камітэта Рэспублікі Беларусь www.gtk.gov.by у рубрыцы «Падарожнікам».

— Дзякуй за гутарку!

Таццяна Серабракова, "Віцебскія весці"