Жыхары Докшыцкага раёна варварску палявалі на ласёў у запаведніку

Палюючы з дапамогай драцяных пятляў у запаведніку, жыхары Докшыцкага раёна здабылі двух ласёў. Браканьераў затрымалі па гарачых слядах і завялі крымінальную справу за незаконную паляванне. Інспектары ацанілі шкоду, нанесеную прыродзе, у 486 мільёнаў рублёў (2 700 базавых велічынь).

Жыхар вёскі Федзёркі Докшыцкага раёна прадаваў суседзям ласінае мяса. Пра гэта ў канцы мінулага месяца ад аднаго з пакупнікоў даведаліся работнікі Бегамльскай міжраённай інспекцыі аховы жывёльнага і расліннага свету і вырашылі наведацца да прадаўца ў госці.

Як расказала прэс-сакратар Дзяржінспекцыі аховы жывёльнага і расліннага свету пры прэзідэнце Рэспублікі Беларусь Вольга Грамовіч, у домаўладанні падазронага інспектары выявілі каля 100 кілаграмаў мяса дзічыны. У лесе каля дома знайшлі тры дзясяткі металічных пятляў - з іх дапамогай браканьер і яго саўдзельнік-аднавясковец лавілі буйную дзічыну.

– Самае абуральнае нават не тое, што парушальнікі карысталіся для палявання варварскімі метадамі. Палявалі яны ў Рожнянскім лясніцтве, якое адносіцца да Беразінскага біясфернага запаведніка, дзе паляванне забаронена, – дадала Вольга Грамовіч. – Тут яны здабылі як мінімум аднаго самца, а таксама самку лася з эмбрыёнам. На месцы раздзелкі туш жывёл нашы работнікі выявілі яшчэ каля 60 кілаграмаў мяса, ужо расфасаванага па мяшках.

Докшыцкі РАСК узбудзіў крымінальную справу па ч. 4 арт. 282 Крымінальнага кодэкса Беларусі. За супрацьпраўныя дзеянні браканьерам давядзецца не толькі пакрыць нанесеную прыродзе шкоду ў суме 486 мільёнаў рублёў, але і як мінімум заплаціць буйны штраф.

Сяргей Мураўскі, СБ Беларусь Сегодня