Жыхары Віцебшчыны сталі часцей здаваць на перапрацоўку старую бытавую тэхніку

За апошні год прадпрыемствам «БелВТІ-рэгіён» у два разы павялічаны аб'ём збору і перапрацоўкі электрычнага і электроннага абсталявання. Спецыялісты звязваюць гэты паказчык з павышэннем экалагічнай пісьменнасці жыхароў Віцебшчыны.

Выконваючы важную дзяржаўную задачу, «БелВТІ-рэгіён», якое мае прадстаўніцтвы ў Полацку, Віцебску і Оршы, вядзе дзейнасць, накіраваную на паляпшэнне экалагічнай абстаноўкі і рацыянальнае выкарыстанне прыродных рэсурсаў. Прадпрыемства актыўна ўдзельнічае ў рэалізацыі палітыкі эфектыўнага кіравання адходамі: ажыццяўляе бясплатны вываз складанай бытавой тэхнікі ад насельніцтва, выконвае першасную перапрацоўку адходаў электрычнага і электроннага абсталявання, займаецца асветніцкай працай.

Чаму ж электроннае і электрычнае абсталяванне нельга выкідваць на звалку? У ім, як нястомна нагадваюць эколагі, утрымліваюцца тыя ці іншыя шкодныя рэчывы: таксічныя металы (мышьяк, кадмій, волава, нікель, цынк, хром), устойлівыя арганічныя забруджвальнікі і злучэнні, газы, якія, трапляючы ў атмасферу, спрыяюць разбурэнню азонавага слоя.

Таксама абстаноўка з энергазберагальнымі лямпачкамі. Унутры іх знаходзіцца ртуць - хімічнае рэчыва першага класа небяспекі. З-за выпадковага пашкоджання лямпы пары ртуці, якія не маюць колеру і паху, трапляюць у паветра і могуць выклікаць цяжкія атручванні. Ні ў якім разе не павінны трапляць у смеццевае вядро і адпрацаваныя элементы харчавання. Якія ўтрымліваюцца там цяжкія металы трапляюць у глебу, грунтавыя воды ці паветра (калі звалка гарыць) і такім чынам паступаюць у харчовыя ланцугі, назапашваюцца ў жывых арганізмах, наносяць істотную шкоду здароўю. Падлічана, што адна толькі пальчыкавая батарэйка здольная забрудзіць 1 кубічны метр глебы ці 400 літраў вады.

Сёння існуе такі вельмі просты спосаб пазбегнуць такіх сумных наступстваў. Калі ў вас, паважаныя чытачы, сапсаваліся халадзільнік, тэлевізар, пыласос, пральная машына ці газавая пліта, трэба ўсяго толькі патэлефанаваць на гарачую лінію «БелВТІ-рэгіён» па тэлефоне (29) 235-235-2. Адмысловая брыгада прыедзе да вас дадому і вывезе тэхніку зусім бясплатна. Пагрузка, дарэчы, таксама за кошт фірмы. А калі вы хочаце крыху зарабіць, то дастаўляйце абсталяванне на пункты прыёму самастойна. У гэтым выпадку ўзнагароджанне складзе 10 капеек за 1 кг.

– Людзі павінны разумець, – адзначыў дырэктар УТПП «БелВТІ-рэгіён» Яраслаў Мамошын, – што кожны від адходаў трэба асаблівым чынам перапрацоўваць. У нас для гэтага ёсць усе ўмовы: створана вытворчая база, атрыманы неабходныя ліцэнзіі, падрыхтаваны кваліфікаваныя спецыялісты. Яны разбяруць тэхніку на часткі, аддзеляць пластык, шкло, гуму, чорныя і каляровыя металы. Карысныя кампаненты будуць пушчаны ва ўтылізацыю, небяспечныя – знявечаныя. Кінескопы, цеплаізаляцыя, дробная фракцыя сумесі палімераў мы адпраўляем на пахаванне. Глыбіня перапрацоўкі апошнім часам павысілася і сёння складае 65%.

Сам Яраслаў Анатольевіч першую адукацыю атрымаў у полацкім лясным тэхнікуме, дзе вучаць любіць і берагчы прыроду. А прыйшоўшы працаваць на прадпрыемства, стаў разбірацца ў праблеме больш дэталёва. Цяпер ён цвёрда ўпэўнены, што негатыўныя наступствы для навакольнага асяроддзя і здароўя чалавека значна лягчэй прадухіліць, чым потым выпраўляць, затрачваючы на ліквідацыю памылак велізарныя сродкі. У перадавых краінах Еўропы сёння перапрацоўваюць да 90% адходаў, але і ў Беларусі, як адзначае кіраўнік, апошнім часам таксама заўважны сур'ёзны прагрэс.

Слесар Аляксандр Новікаў і тэхнолаг Арсеній Лінтовік

Вось і «БелВТІ-рэгіён» за мінулы год сабрала і пусціла ў перапрацоўку каля 300 тон электрычнага і электроннага абсталявання, удвая больш, чым у 2015-м. Адпраўка на знявечанне адпрацаваных батарэек таксама вырасла ў два разы – да 6 тон, а ртуцьзмяшчальных лямпаў – амаль у пяць разоў: да 16 тысяч штук.

Спрыяе гэтаму стварэнне шырокай сеткі пунктаў збору: спецыяльныя кантэйнеры для элементаў харчавання, лямпаў і дробнага электроннага абсталявання ўстаноўлены ва ўсіх буйных крамах вобласці. Вялікую тлумачальную працу сярод насельніцтва праводзяць экалагічныя атрады і іншыя грамадскія фарміраванні ўстаноў адукацыі.

Активізуюць дзейнасць па зборы адходаў асобныя прадпрыемствы і арганізацыі: да прыкладу, жыллёва-камунальныя службы і «Водаканалы» Полацка і Наваполацка, Глыбоцкае ЖКГ, Віцебскае прадпрыемства кацельняў і цеплавых сетак. Сітуацыя, лічыць Яраслаў Мамошын, будзе паляпшацца і далей – трэба проста паслядоўна працаваць на вынік.

Ларыса МАЛАШЭНЯ, фота аўтара. "Віцебскія весці".