Жыхарам Віцебска дакладны час прыбыцця аўтобуса падскажа мабільны сэрвіс

Жыхарам Віцебска дакладны час прыбыцця аўтобуса падскажа новая мабільная паслуга. Унікальную для Беларусі паслугу - інфармаванне аб фактычным часе прыбыцця грамадскага транспарту - укараніў мабільны аператар МТС, паведамілі БЕЛТА ў прэс-службе кампаніі.

Пакуль паслуга даступная толькі жыхарам Віцебска, аднак у будучыні яна павінна з'явіцца і ў іншых гарадах Беларусі. Даведацца дакладны час прыбыцця змогуць толькі абаненты МТС. Для гэтага трэба будзе адправіць USSD-запыт, кошт якога складае Br180.

Час прыбыцця транспарту разлічваецца на падставе рэальнага руху аўтобусаў (з улікам "пробак", аварый, спазненняў у гадзіну пік і г.д.), а не статычнага раскладу, які паказаны на прыпынках або інтэрнэт-сайтах. Віцебскія аўтобусы абсталяваны GPS-прыёмнікамі спадарожнікавай навігацыі, а таксама SIM-картамі МТС. Сістэма вызначае месцазнаходжанне аўтатранспарту, а атрыманыя дадзеныя адпраўляе па мабільным Інтэрнэце ў дыспетчарскія пункты. На падставе гэтай інфармацыі і фактычнай адлегласці да прыпынку паслуга разлічвае рэальны час.