Журы пакуль не змагло выбраць, хто будзе прадстаўляць Беларусь на «Славянскім базары».
Для вызначэння прадстаўніка Беларусі на міжнародным конкурсе выканаўцаў эстраднай песні "Віцебск", які пройдзе падчас ХХII Міжнароднага фестывалю мастацтваў "Славянскі базар у Віцебску", будзе арганізавана паўторнае праслухоўванне, перадае карэспандэнт БЕЛТА.
Сёння ў Мінску прайшоў другі этап адборачнага тура. У ім прынялі ўдзел 10 выканаўцаў - з Мінска, Барысава, Маладзечна, Гродна, Віцебска, Магілёва і інш. Судзейская калегія спыніла свой выбар на двух кандыдатах: артысце Нацыянальнага акадэмічнага аркэстра сімфанічнай і эстраднай музыкі Рэспублікі Беларусь Аляксандры Салаўёве і выкладчыку Беларускага дзяржаўнага ўніверсітэта культуры і мастацтваў па класе вакалу Аляксандры Кавалёве. Праз тыдзень адбудзецца паўторнае праслухоўванне конкурсантаў. За гэты час удзельнікі павінны выбраць са свайго рэпертуару кампазіцыі, якія максімальна раскрыюць іх вакальныя даныя.
У склад журы ўвайшлі мастацкі кіраўнік заслужанага калектыву Рэспублікі Беларусь ансамбля "Сябры" народны артыст Беларусі Анатоль Ярмоленка, народны артыст Беларусі Эдуард Зарыцкі, мастацкі кіраўнік Маладзёжнага тэатра эстрады народны артыст Беларусі Васіль Раінчык, кампазітар Алег Елісеенкаў. Старшыня экспертнай групы - першы намеснік міністра культуры Уладзімір Карачэўскі.
Заўтра судзейская калегія назаве імёны ўдзельнікаў дзіцячага музычнага конкурсу. Беларусь на песенным форуме будуць прадстаўляць два маленькія артысты.
XXII Міжнародны фестываль мастацтваў "Славянскі базар у Віцебску" плануецца правесці з 11 па 17 ліпеня.