Вядомыя і міфічныя коні – у Мастацкім музеі Віцебска. Скульптар Сяргей Бандарэнка прадставіў свае працы

У Мастацкім музеі адкрылася выстава скульптур Сяргея Бондаранкі, на якой ва ўсёй красе прадстаўлены знакамітыя і міфічныя коні.

Сяргей Бондаранка – стваральнік помніка князю Альгерду, роўна год таму ўстаноўленага ў Віцебску. На сённяшні дзень монумент з'яўляецца самай буйной коннай статуяй у Беларусі. На адкрыцці сваёй экспазіцыі скульптар прызнаўся, што даўно марыў вырабіць конны помнік, і гэта, нарэшце, адбылося.

– Можна сказаць, што Віцебск стаў горадам маёй мары. Таму я вырашыў паказаць яго жыхарам, што дадзеная праца не выпадковая ў маёй творчасці, прадставіць, чым я займаюся ўсё жыццё, – растлумачыў аўтар.

Сяргей Бондаранка скончыў Беларускі дзяржаўны тэатральна-мастацкі інстытут, а затым практыкаваўся ў творчых майстэрнях Акадэміі мастацтваў СССР у Мінску пад кіраўніцтвам Заіра Азгура. Яго першыя працы экспанаваліся ў 1972 годзе ў японскім Сапара ў рамках Сусветнай выставы ЭКСПА. З таго часу ён прадстаўляў свае скульптуры ў многіх краінах свету, а ў Кітаі стаў нават ганаровым членам акадэміі мастацтваў.

Асаблівая запал скульптара – коні. На працягу многіх гадоў ён ездзіў на міжнародныя спаборніцтвы па скачках, часта наведваў Рэспубліканскі цэнтр алімпійскай падрыхтоўкі коннага спорту і конегадоўлі ў Ратамцы, шукаў натуры для сваіх твораў. Заказы ўладальнікаў дазволілі Сяргею Бондаранку працаваць з найпрыгажэйшымі коньмі свайго часу. Сярод іх прыгажун Рэмбрант – самы знакаміты прадстаўнік вестфальскай пароды. У музейнай экспазіцыі можна ўбачыць і спартыўных коней, і коней-працаўніц, і княжацкіх коней. На выставе прадстаўлена 20 твораў аўтара, а ўсяго ў майстэрні скульптара іх больш за 250.

Сяргей Бандарэнка з матэрыялаў аддае перавагу бронзе, выконвае ўсе стадыі працы, ад пластылінавай мадэлі да адліўкі. Ён авалодаў старадаўнім спосабам ліцця, так званай тэхнікай страчанага воску, вядомай яшчэ з VII стагоддзя да нашай эры, і стаў майстрам у гэтай справе. Некалькі гадоў таму па замове Цэрэтэлі адліваў сувенірныя копіі яго Калумба. Аўтарскія працы беларускага майстра знаходзяцца ў музеях і прыватных калекцыях многіх краін свету. На працягу месяца жыхары і госці Віцебска маюць магчымасць пазнаёміцца з творчасцю аўтара помніка, які стаў адным з сімвалаў старадаўняга горада на Дзвіне.

Выстава ў Мастацкім музеі будзе адкрыта да сярэдзіны ліпеня.

Таццяна Пастэрнак, "Віцебскія весці"