«Славянскі базар у Віцебску» пройдзе з 13 па 17 ліпеня. Частка білетаў паступіць у продаж 17 лютага і першыя тры дні будзе даступная толькі ў касах горада Віцебска, а вось з 20 лютага купіць квіткі можна ў інтэрнэт-аператараў. Святочная прапанова ад Дырэкцыі фестывалю — падарункавыя сертыфікаты, продаж якіх таксама пачынаецца ў канцы лютага. Яшчэ адзін сюрпрыз – абанемент на ўсе падзеі конкурсу маладых выканаўцаў. Да яго бонусам ідзе наведванне паўфіналу. Пакуль у праграме Летняга амфітэатра 17 мерапрыемстваў, аднак канцэртаў можа быць і больш. Праца па фарміраванні праграмы працягваецца.

Кіраўніцтва Адміністрацыі Прэзідэнта сёння па ўсёй краіне праводзіць выязныя прыёмы па пытаннях рэалізацыі норм дэкрэта №3 "Аб папярэджанні сацыяльнага ўтрыманства". У Віцебску з грамадзянамі сустракаўся памочнік Прэзідэнта Беларусі - галоўны інспектар па Віцебскай вобласці - Аляксандр Пазняк. Ён адзначыў, што такая форма работы дазваляе пачуць праблемы простага чалавека і своечасова адрэагаваць на іх.

Першае трактарнае ралі «Парыж – Мосар» прайшло на Віцебшчыне. Маршрут гонак па бездарожжы пралёг па тэрыторыях Пастаўскага і Глыбоцкага раёнаў.

Забяспечыць даступнасць і высокую якасць медыцынскага абслугоўвання ва ўмовах абмежаванага бюджэтнага фінансавання. Такая задача стаіць перад сістэмай аховы здароўя Віцебшчыны ў бягучым годзе. На пасяджэнні аблвыканкама разгледжаны вынікі рэалізацыі дзяржаўнай праграмы «Здароўе народа і дэмаграфічная бяспека Рэспублікі Беларусь» у мінулым годзе і задачы на бліжэйшыя 5 гадоў.

Аптымальная арганізацыя сельскагаспадарчай вытворчасці, павелічэнне пагалоўя буйной рагатай жывёлы і ўдасканаленне сістэмы аплаты працы работнікаў. На чарговай нарадзе ў старшыні Віцебскага аблвыканкама Мікалая Шарснёва прааналізавалі стан жывёлагадоўлі ва Ушацкім, Талачынскім і Сенненскім раёнах. Справы ў гэтых рэгіёнах ідуць не лепшым чынам. Вытворчасць малака, яго якасць і колькасць пагалоўя за 2016 год знізіліся. Як пераадолець сельскагаспадарчы крызіс на мясцовым узроўні, сёння і вырашалі спецыялісты.

Гарадскі пасёлак Руба неабходна прывесці ў парадак у бліжэйшыя два гады. Такую задачу перад мясцовай уладай паставіў старшыня Віцебскага аблвыканкама Мікалай Шарснёў на пасяджэнні рабочай групы па пытаннях добраўпарадкавання і навядзення парадку ў населеным пункце. Усе асноўныя сілы будуць накіраваны на аб'екты сацыяльнай структуры. Рэканструкцыя пачалася ў Палацы культуры і тэхнікі. Школа мастацтваў прапішацца ў былым будынку Дома быту, рамонт правядуць у школе і дзіцячых садках.

У Віцебску прайшоў 25-ы міжнародны турнір па вольнай барацьбе памяці нашага земляка, капітана трэцяга рангу Анатоля Іспянкова, і загінуўшых членаў экіпажа атамнай падводнай лодкі «Камсамолец». Спаборніцтвы сабралі каля двухсот пяцідзесяці спартсменаў з Расіі, Латвіі і рэгіёнаў Беларусі. На працягу некалькіх дзён юнакі і дзяўчаты разыгралі 20 камплектаў узнагарод.

Развіццё мінеральна-сыравіннай базы, збор і ўтылізацыя цвёрдых камунальных адходаў, захаванне біялагічнай і ландшафтнай разнастайнасці Віцебскага рэгіёну — гэтыя пытанні абмеркавалі на выніковым пасяджэнні калегіі Віцебскага абласнога камітэта прыродных рэсурсаў.

Меры па фінансавым аздараўленні прадпрыемстваў АПК, якія прымаюцца ў краіне, даюць станоўчы эфект, адзначыў прэм'ер-міністр падчас рабочай паездкі ў Глыбоцкі раён.