Віцебскія азеляняльнікі ўпершыню правялі паспяховую перасадку 50-гадовых канадскіх ел, расказаў карэспандэнту БЕЛТА галоўны інжынер камунальнага унітарнага прадпрыемства "Зеленстрой" Дзмітрый Нікіцюк. У сувязі з рэканструкцыяй плошчы Перамогі ў абласным цэнтры спецыялістам "Зеленстроя" давялося правесці перасадку 20 ел, сярэдні ўзрост якіх складае каля 50 гадоў. Па словах Дзмітрыя Нікіцюка, тэхналогія перасадкі буйнагабарытных дрэў апрабавана і апраўдана, аднак такія старыя "Зеленстрою" перасаджваць яшчэ не даводзілася. Частку ел перасялілі ў парк імя Савецкай Арміі, а яшчэ 8 дрэў дапоўнілі алею канадскіх ел у Батанічным садзе Віцебскага дзяржуніверсітэта. Нягледзячы на тое, што з часу перасадкі прайшоў крыху больш за месяц, елкі ўжо далі малады прырост. Такім чынам, першы этап перасадкі прайшоў паспяхова, заключыў Дзмітрый Нікіцюк.